Policia konfirmon marrjen në mbrojtje të Krasniqit, Abdixhikut dhe të tjerëve

Dy liderët e partive opozitare, Memli Krasniqi, kryetar i Partisë Demokratike të Kosovës dhe Lumir Abdixhiku, kryetar i Lidhjes Demokratike janë marrë ditën e hënë në mbrojtje nga Policia e Kosovës, pas kërcënimeve për sulm ndaj tyre.

Nga Policia e Kosovës konfirmuan për Telegrafin se vendimi për ofrimin e sigurisë është ndërmarrë pas informacioneve të gjetura.

“Policia e Kosovës në kuadër të detyrave dhe autorizimeve ligjore që ka, bënë edhe vlerësimin e sigurisë së personaliteteve të rëndësisë së veçantë dhe varësisht nga informacionet apo të gjeturat ndërmerr masat për ofrimin e sigurisë. Në këtë rast edhe ndaj personaliteteve në fjalë ka ndërmarrë masa për ofrimin e sigurisë dhe të njëjtëve sipas vlerësimit iu është ofruar siguri”, thuhet në përgjigjen e dhënë nga Policia e Kosovës.

Lexo po ashtu "Kërcënimet nga grupe terroriste serbe": Policia merr në mbrojtje Krasniqin, Abdixhikun e politikanë të tjerë

Ndërkaq, sot kreu i PDK-së, Memli Krasniqi është parë duke u përcjellë nga Policia e Kosovës.

Krasniqi para mediave ka thënë se asnjëherë nuk është ndjerë i kërcënuar edhe kur kanë rrjedh informacione për vrasje.

“Nuk jam ndjerë asnjëherë i kërcënuar edhe kur na ka rrjedh informacion për kërcënime me vrasje edhe para pak muajsh. Por, ka qenë vlerësim i organeve të sigurisë që të na ofrojnë mbrojtjen e afërt, për arsye besoj që ata duhet të tregojnë, besoj që lidhet me situatën e tensionuar dhe të përkeqësuar pas sulmeve në veri të vendit”, ka thënë Krasniqi.

Kurse, nënkryetari i Lidhjes Demokratike të Kosovës (LDK), Lutfi Haziri para mediave foli për kërcënimet ndaj kreut të partisë së tij.

“I ka besu vlerësimeve të organeve të shtetit, dhe po sillet karshi atij vlerësimi. Nuk ka ndërpre asgjë në agjendën edhe në rutinën e tij. Policia ka kapacitete profesionale me siguru, vetëm është rrit kujdesi i organeve të sigurisë. Pasiguri juridike ka në Kosovë dhe kjo është më problematike dhe na shqetëson si LDK më shumë”, ka thënë Haziri.

Lexo po ashtu Kërcënimet ndaj kreut të LDK-së, deklarohet Haziri

Ndryshe, javë më parë Lëvizja Vetëvendosje (VV) dhe Lidhja Demokratike e Kosovës (LDK) kishin vlerësuar se rreziku potencial për sulme apo aktivitete të tjera kundër rendit ligjor e kushtetuese ekziston ende.

Deputeti i LVV-së Enver Dugolli, i cili është edhe anëtar i Komision për Çështjet e Sigurisë dhe Mbrojtjes, tha se duke marr parasysh që një pjesë e madhe e armëve është konfiskuar, rigrupimi i terroristëve i dirigjuar nga Serbia vazhdon që të jetë ende kërcenim për Kosovën.

“Rreziku mbetet për shkak se ai formacion një pjesë e tyre e madhe është larguar ka ikur për Serbi. Ndonëse një pjesë të madhe të armatimit e kemi zënë pra është i konfiskuar, por rigrupimi i tyre i dirigjuar nga Serbia vazhdon që të jetë ende kërcenim për Kosovën”, është shprehur ai.

Po ashtu, edhe deputeti i LDK-së, Anton Quni, kishte deklaruar se edhe përkundër suksesit të PK-së në aksioni e 24 shtatorit, kjo nuk duhet që të krijojë komoditet./Telegrafi/