Policia e Shqipërisë me strukturë të re, shkrihet FNSH dhe ngrihet “Forca Kombëtare e Sigurisë Publike”

Ministri i Brendshëm, Taulant Balla njoftoi sot krijimin e një strukture të re të policisë, që do të quhet “Forca Kombëtare e Sigurisë Publike”.

Në një intervistë televizive, Balla sqaroi se nuk do të ketë dy polici, por do të jetë një strukturë e re brenda Policisë së Shtetit.

Ai njoftoi shkrirjen e strukturës së ndërhyrjes së shpejtë FNSH.

“Jo vetëm FNSH, do futen edhe struktura të tjera, ku përjashtohet RENEA. RENEA do vijojë siç është, është histori e madhe suksesi. Por, është e pamundur për shembull që Policia vendore e Sarandës të përballojë një sezon turistik me forcat e veta. Atëherë, Forca Kombëtare e Sigurisë pikërisht do të ketë. Në momentin që kemi familjaritet të tepërt të policisë vendore me elementët kriminalë me problematikat e sigurisë, Forca Kombëtare e Sigurisë do të jetë një forcë, në drejtimin e drejtpërdrejtë të drejtorit të përgjithshëm të Policisë së Shtetit, që shkon dhe merr përsipër operacionet, vendosjen e sigurisë publike, shtimin e forcave sa i përket ngjarjeve të mëdha”, tha ai.

Balla theksoi gjithashtu se prioritet kryesor mbetet paketa e sigurisë në shkolla dhe goditja e fenomenit të shpërndarjes së lëndëve narkotike.

Ndërsa përmendi mbi 400 të arrestuar në kuadër të operacionit të koduar “Tempulli”, Balla tha se lufta kundër trafikut drogës duhet të jetë më sistematike.

Ministri vuri gjithashtu në dukje edhe faktin se gjatë këtij sezoni turistik, nuk ka pasur asnjë ngjarje kriminale të ndodhur ndaj një shtetasi të huaj. “Kjo e ka bërë Shqipërinë jo vetëm një destinacion turistik me natyrë dhe bregdet të veçantë, por edhe një destinacion më të sigurt”, shtoi ai. /Telegrafi/