Poezia e Avni Deharit, e vitit 1999 – kthimit të tij në Kosovë: Atje po shkojmë

Babai i Astrit Deharit, Avniu, me rastin e çlirimit të Kosovës nga forcat serbe, më 1999, planifikon të kthehet me familje në Prishtinë. Me këtë rast ai ka shkruar poezinë të cilën mund ta lexoni më poshtë.

Lexo po ashtu Avni Dehari, poezi për të birin: “Pse të vranë o Astrit Dehari!?”

Lexo po ashtu Poezi prekëse nga Avni Dehari, babai i Arbënorit dhe Astritit

Lexo po ashtu Fjalimi prekës i babait të Astritit: Madhështia jote shpërtheu grilat e burgut (Video)

ATJE PO SHKOJMË

(Me rastin e kthimit nga mërgimi)

Po shkojmë Albanë, po shkojmë

Në Dardani, pranvera ime,

Në tokën tonë, që etja për liri

E ka plasaritur, e ka çarë,

Atje ku ti kurrë nuk ke shkelur,

E unë 19 vjet, shekuj për mua,

Veç ënderr e kam parë!

Po ndahemi Xhemile, po ndahemi

Për një vit, gruaja ime e shtrenjtë,

Që të jemi prapë bashkë

Në Dardaninë tonë të shenjtë!

Po ndahemi Arbënor, po ndahemi,

Arbënori im i urtë, biri im i mirë,

Që pas nje viti të përqafohemi

Në Dardaninë tonë të lirë!

Po ndahemi Astrit, po ndahemi,

O syrrushi im, i mirë shumë,

Do ta kujtoj bisedën e mbrëmjeve,

Para se të merrte i ëmbli gjumë:

“Astrit, shumë, shumë të dua!”

“Babi, unë ty edhe një herë më shumë!”

Po shkojmë, o atje, atje po shkojmë,

Të dashurit, të mirët e mi,

Atje, në Dardani, po shkojmë

Në vendin tonë, si njerëz, në liri!

(Bernë, 1999)