Plagosjet e vrasjet aksidentale nga policët, kërkohet zgjatja e shkollimit dhe trajnim i vazhdueshëm i tyre

Në fillim të kësaj jave një zyrtar policor, plagosi me armë zyrtare të afërmin e tij e që sipas hetimeve preliminare dyshohet se ishte aksidentale. Për të evituar të tilla raste, po kërkohet zgjatja e shkollimit të policëve e trajnimet e vazhdueshme.

Derisa po bëhej gati për punë, polici i gjeneratës së fundit Fatjon Hoti, me armë zyrtare plagosi tezakun e tij duke i shkaktuar lëndime të rënda në kokë.

Por ky nuk është rasti i vetëm kur zyrtarët policorë aksidentalisht qëllojnë me armë, e ku nuk kanë munguar edhe rastet me fatalitet.

Një i tillë kishte ndodhur në shkurt të 2022, ku polici Fatlum Mehmeti, në një ndejë me kolegë të tij në Zllatar të Prishtinës, e kishte privuar nga jeta policin Lirim Haxholli.

E ish-drejtori i Akademisë Policore, Hajrullah Tërnava, po kërkon që të rikthehet shkolla policore që ka qenë në kohën e ish-Jugosllavisë ku parashihet që policët të vijojnë mësimin 4 vite.

Lexo po ashtu Incidentet me armë zyrtare, Sylejmani: Mosha e policëve që pranohen në Policinë e Kosovës të ngritet në 20 vjeç

“Gjithherë e ka pas instruktorin, i cili e ka përgatit edhe e ka mësu për armë, qysh mbushet arma, qysh duhet me bartë armën, qysh zbrazet, qysh përdoret në rast shënjestrimit edhe përgatitjeve që i kanë pasë nëpër poligone të ndryshme. Kanë pas poligon edhe në vetë akademinë, por edhe kemi bërë stërvitje që i kemi detyru në vit një kohë të konsiderueshme me kalu edhe në stërvitje në vendet malore”, tha Tërnava, për tëvë1.

Sipas tij kjo është e efektshme për shkak se një praktikë të njëjtë e përdorin edhe shtetet e Bashkimit Evropian.

“Akademitë policore në shtetet e Evropës, BE-së ku na po tentojmë me udhëtu edhe mu bë anëtare e rregullt, i kanë akademitë policore 3-vjeçare etj., që përgatitet ajo polici që me i mbulu ato institucione shtetërore dhe me i jetësu ato ligje dhe kushtetutën e atyre shteteve në përpikëri pa ekscese pa raste të rënda”, tha Tërnava.

Hartuesi i Ligjit për Policinë, Nuredin Ibishi, po kërkon që edhe pas pranimit të policëve të rinj, ata t’u nënshtrohen vazhdimisht trajnimeve të ndryshme.

“Përdorimi i armës si mjet i fundit i skajshëm gjithsesi duhet me iu nënshtru procedurave të trajnimit por edhe certifikimit dhe kjo e bën të domosdoshme jo vetëm një periudhë kohore. Ai duhet në periudha të caktuara kohore të ricertifikohet me qëllim pra shërbimi gjegjësisht vetë mbikëqyrja të bindet se zyrtari policor ka marrë trajnimet e duhura”, tha Ibishi.

Tëvë1 ka kërkuar statistika nga Inspektorati Policor i Kosovës se sa është numri i zyrtarëve që kanë kryer një vepër të tillë, mirëpo përgjigje nuk ka pasur.