Përgatitjet për një samit të mundshëm mes presidentit amerikan, Donald Trump dhe homologut rus, Vladimir Putin, i planifikuar të mbahej në Budapest, janë pezulluar përkohësisht.
Ky zhvillim vjen pas vështirësive të hasura në komunikimet e para diplomatike mes dy palëve, si dhe për shkak të qëndrimeve të pandryshuara të Kremlinit mbi çështjen e Ukrainës.
Telefonata e parë zyrtare mes Sekretarit të Shtetit të SHBA-së, Marco Rubio, dhe Ministrit të Jashtëm rus, Sergey Lavrov, u cilësua si “produktive” nga burime zyrtare, por gjithashtu u bë e qartë se nuk pati përparim të mjaftueshëm për të çuar përpara bisedimet për samitin.
Vetë Trump raportohet se ka shprehur dyshime për vijimin e procesit, duke thënë se “të dyja palët ende nuk janë gati që bisedimet të ecin përpara në mënyrë kuptimplote”.
NBC News duke cituar një zyrtar të lartë të Shtëpisë së Bardhë, raportoi se procesi i përgatitjeve është pezulluar për një periudhë të pacaktuar. Vendimi për pezullimin është marrë pas vlerësimeve se nuk ka klimë të favorshme për zhvillimin e një dialogu të frytshëm mes dy liderëve në këtë fazë.
Sipas një raportimi nga Reuters, e gjithë nisma është vënë në pikëpyetje pas refuzimit të Kremlinit për të pranuar një armëpushim të menjëhershëm në Ukrainë — një kusht kyç i vendosur nga pala amerikane për të vazhduar përgatitjet për takimin. Pa një marrëveshje për ndalimin e luftimeve, samiti nuk konsiderohet i mundshëm.
Një tjetër burim diplomatik, i cili foli në kushte anonimiteti, u shpreh për mediat se Moska “nuk e ka ndryshuar aspak qëndrimin e saj” që prej fillimit të luftës në Ukrainë. Sipas këtij burimi, gjatë bisedës telefonike, Lavrov përsëriti deklaratat e zakonshme rreth “interesave të sigurisë ruse” dhe akuzat ndaj Perëndimit, gjë që e shtyu sekretarin Rubio të mbyllte bisedën para kohe.
Aktualisht, nuk ka ndonjë datë të re të përcaktuar për rifillimin e përgatitjeve dhe e ardhmja e samitit mbetet e pasigurt. Zhvillimi i mëtejshëm i kësaj nisme do të varet nga lëvizjet politike dhe diplomatike që do të ndërmerren në javët apo muajt në vijim, veçanërisht në lidhje me konfliktin në Ukrainë dhe gatishmërinë e të dyja palëve për kompromise reale. /Telegrafi/
