Kandidati për raportues në PE për Kosovën, austriaku Waitz: I lumtur të kontribuoj për stabilitetin e rajonit

Thomas Waitz, deputet austriak i Parlamentit Evropian, për të cilin mediat raportuan se është potencialisht raportuesi i ri për Kosovën në Parlamentin Evropian për Kosovën, thotë se ende nuk ka një vendim përfundimtar se cili grup dhe cili deputet do të ndërmarrë këtë detyrë të rëndësishme.

Waitz, për median serbe “Danas”, thotë se është i lumtur të kontribuojë për stabilitetin e të gjithë rajonit dhe marrëdhëniet e mira fqinjësore.

“Nëse kam nderin ta bëj përmes raportit për vendin e Kosovës, do të bëj çmos për të kontribuar në zhvillimin jo të dhunshëm, të respektueshëm dhe të begatë në rajon në përgjithësi dhe në veçanti në rajonin e Serbisë dhe Kosovës në veçanti”, thotë ai, transmeton Telegrafi.

Zëdhënësja e eurodeputetit austriak, Inge Chen tha atëherë se po vazhdojnë diskutimet për emërimin e raportuesit për Kosovën në Parlamentin Evropian, por ajo nuk e mohoi as konfirmoi se kjo pozitë mund të mbetet me grupin e të Gjelbërve.

“Diskutimet dhe negociatat janë duke u zhvilluar, kështu që ne nuk mund të komentojmë në këtë moment. Shpresojmë se shumë së shpejt do të dimë më shumë dhe nëse të Gjelbrit do ta ruajnë postin e raportuesit për Kosovën”, shpjegoi ajo.

Për gjithë dekadën e fundit, postin e raportuesit për Kosovën në Parlamentin e Evropës e kanë mbajtur të Gjelbrit. Nga viti 2019 deri në vitin 2024 këtë post e ka mbajtur eurodeputetja gjermane Viola von Cramon, ndërsa para saj austriakja Ulrike Lunaçek. /Telegrafi/