Përfundon takimi, zv.kryeministrja Emilija Rexhepi tregon çka biseduan Kurti dhe Macron

Zëvendëskryeministrja e Kosovës, Emilija Rexhepi ka dhënë detaje nga takimi që u zhvillua sonte mes presidentit francez, Emmanuel Macron dhe kryeministrit të Kosovës, Albin Kurti, në Pallatin Elysse në Paris.

Në takimin, i cili zgjati më shumë se një orë, Rexhepi tha se është diskutuar për tema me shumë rëndësi, siç është dialogu mes Kosovës e Serbisë, liberalizimi i vizave, nevojën për furnizim me vaksina, arsimin dhe rrugën e Kosovës drejt BE-së.

“Kemi pasur një takim shumë miqësor, më shumë se një orë me presidentin Macron, një takim shumë të sinqertë. Kemi diskutuar për mundësinë që Kosova të furnizohet me vaksina anti-COVID, për më shumë investime nga Franca në Kosovë, për arsimin, liberalizimin e vizave si prioritet i Qeverisë Kurti, dialogun me Serbinë dhe rrugën më të lehtë për në Bashkimin Evropian”, ka bërë të ditur Rexhepi për Telegrafin.

Ajo po ashtu theksoi se gjatë takimit kryeministri Kurti ka ftuar presidentin Macron për vizitë në Kosovë.

E pyetur nëse ka parë shenja pozitive nga presidenti Macron, se do të përkrah Kosovën në kërkesat e saj gjatë procesit të dialogut me Serbinë, Rexhepi tha se Kosova do të ketë lidhje të ngushtë dhe përkrahje të plotë nga Franca.

“Për mua Franca është një shtet shumë i rëndësishëm në Evropë dhe presidenti  Macron njëri nga liderët më të fuqishëm. Patjetër se duhet që Kosova të ketë lidhje të ngushtë dhe përkrahje të plotë nga Franca”, u shpreh Rexhepi.

Ndryshe, kryeministri i Kosovës, Albin Kurti, dhe presidenti i Francës, Emmanuel Macron, para takimit në Pallatin Elysee në Paris kanë mbajtur një konferencë shtypi.

Macron ka thënë se shteti i tij do të vazhdojë përkrahjen për Kosovën, ndërkaq theksoi se fton Kosovën e Serbinë për gjetjen e një kompromisi dhe arritjen e marrëveshjes.

Lexo po ashtu Macron para takimit me Kurtin: Ftoj Kosovën e Serbinë të angazhohen për gjetjen e një kompromisi në dialog

Kryeministri Albin Kurti gjatë konferencës për media me presidentin francez Emmanuel Macron, ka vlerësuar lart rolin e Francës në çlirimin e Kosovës.

Kurti tha se është privilegj dhe përgjegjësi që të takohet si kryeministër i Kosovës me presidentin e Francës.

Kryeministri Kurti në fund ka ftuar presidentin Macron për një vizitë në Kosovë.

Në takimin e kryeministrit Kurti  me presidentin Macron, ishte i pranishëm edhe zëvendëskryeminsitri Besnik Bislimi. 

Presidenti i Francës, Emmanuel Macron ka qenë personalisht i përfshirë në përshpejtimin e procesit të arritjes së një marrëveshjeje midis Kosovës dhe Serbisë por edhe të proceve tjera në Ballkanin Perëndimor.

Nën organizimin e tij dhe të kancelares gjermane, Angela Merkel ishte mbajtur samiti i Berlinit më 29 prill 2019. Por, pak sukses ishte arritur pasi dialogu mes Kosovës dhe Serbisë ishte ndërprerë për shkak të një takse që kishte vënë Kosova për mallrat serbe.

Më 1 prill, në një letër që presidenti francez Macron ia kishte dërguar kryeministrit Kurti, kishte thënë se ai shpreson që dialogu do të vazhdojë, në mënyrë që të arrihet “një marrëveshje gjithëpërfshirëse, përfundimtare dhe ligjërisht e detyrueshme, e cila është një nga kushtet për afrimin evropian të Kosovës, sikurse edhe të Serbisë”.

Kryeministri i Kosovës, Albin Kurti dhe presidenti i Serbisë, Aleksandar Vuçiq u takuan për herë të parë më 15 qershor në Bruksel, në kuadër të dialogut Kosovë-Serbi.

Kurti kishte propozuar nënshkrimin e një marrëveshjeje të paqes, ku Kosova dhe Serbia do të zotoheshin që nuk do ta sulmojnë njëra-tjetrën, si dhe ka kërkuar njohjen e ndërsjellë.

Ndërkaq, Vuçiq kishte ngritur çështjen e formimit të Asociacionit të komunave me shumicë serbe në Kosovë.

Megjithatë, palët nuk u morën vesh për temat e ngritura./Telegrafi/