Përfundon sezoni vjeshtor në Albi Mall Superligë, Drita dimëron si kampion

Ka përfunduar sezoni vjeshtor në Albi Mall Superligën e Kosovës me 10 skuadrat që kanë zhvilluar tanimë nga 18 ndeshje.

Ndeshja e fundit e këtij stinori vjeshtor ishte ajo mes Ballkanit dhe Prishtinës e mbetur nga xhiro e 14-të dhe që përfundoi pa fitues 1-1.

Kësisoj pas 18 xhirove të zhvilluara, Drita e Gjilanit ka mbetur në krye të tabelës me 38 pikë, aq sa ka edhe Ballkani në vendin e dytë.

Drita dimëron si kampion për faktin se ka bilanc më të mirë në ndeshjet direkte ndaj Ballkanit me një fitore e një barazim si dhe golëdallim më të mirë.

Drita në 18 ndeshje ka marrë 11 fitore, pesë barazime e dy humbje, teksa ka shënuar 36 gola e ka pranuar 19 të tjerë. Ndërkohë Ballkani në 18 ndeshje ka bilanc të njëjtë si Drita të fitoreve, barazimeve e humbjeve, por ka shënuar 30 gola e ka pranuar 15 të tjerë.

Në pozitën e tretë e mbyll Prishtina me 27 pikë, sa ka edhe Gjilani në të katërtin, ndërkohë në vendin e pestë është Dukagjini me 22 pikë. E gjashta është Llapi me 20 pikë sa ka edhe Drenica në pozitën e shtatë.

Malisheva dhe Trepça ’89 ndajnë pozitat tetë dhe nëntë me nga 19 pikë, derisa e fundit është Ferizaj me 13 pikë. /Telegrafi/