Një gjykatë franceze dënoi algjerianen Dahbia Benkired me burgim të përjetshëm pa mundësi lirimi me kusht të premten për përdhunimin, torturën dhe vrasjen e 12-vjeçares Lola Daviet.
Me këtë vendim, Benkired u bë gruaja e parë në Francë që iu dha dënimi më i ashpër i mundshëm.
Rasti, i cili tronditi vendin në vitin 2022, shkaktoi gjithashtu një debat të nxehtë rreth imigracionit, duke qenë se i dënuari nuk kishte një leje qëndrimi të vlefshme, shkruan Le Monde .
Benkired, tani 27 vjeç, u arrestua menjëherë pasi vajza u zhduk në verilindje të Parisit.
Trupi i Lola Daviet u gjet në një arkivol në hollin e ndërtesës ku prindërit e saj punonin si pastrues.
Në arsyetimin e tij për vendimin, kryetari i trupit gjykues theksoi "mizorinë e jashtëzakonshme të krimeve", duke i përshkruar ato si "torturë të vërtetë".
"Në përcaktimin e dënimit të duhur, gjykata mori parasysh dëmin e papërshkrueshëm psikologjik ndaj viktimës dhe familjes së saj në rrethana të tilla të dhunshme dhe pothuajse të papërshkrueshme."
Më herët gjatë ditës, prokurori kishte kërkuar një "dënim të përjetshëm të pakthyeshëm", dënimi më i ashpër sipas ligjit francez, i cili nuk lejon lirimin me kusht.
Ai theksoi se dënimi duhet të pasqyrojë "rëndësinë e jashtëzakonshme" të krimeve, "mizorinë e tyre" dhe "vuajtjet" e shkaktuara familjes.
Hetuesit përcaktuan se Benkired e përdhunoi dhe e torturoi vajzën përpara se ta mbyste.
Në fillim të gjyqit javën e kaluar, Benkired kërkoi falje për veprimet e saj "të tmerrshme".
Megjithatë, tre psikiatër mjeko-ligjorë dëshmuan se kishin vërejtur tendenca "psikopatike" tek e pandehura dhe nuk besonin se ajo vuante nga një çrregullim mendor i shërueshëm.
Çështja është shfrytëzuar nga politikanë konservatorë dhe të ekstremit të djathtë për të kërkuar zbatim më të rreptë të ligjeve të imigracionit, pasi doli në dritë se Benkired kishte tejkaluar afatin e vizës së saj studentore dhe kishte injoruar urdhrat për t'u larguar nga Franca.
Ndërkohë, nëna e viktimës u ka kërkuar politikanëve të ndalojnë shfrytëzimin e vdekjes së vajzës së saj për përfitime politike.
Ndryshe, viktima po kthehej nga shkolla kur Benkired e joshi të shkonte në apartamentin e motrës së saj dhe e mbyti.
"Ndoshta ka pasur goditje të shumta në kokë, me dhimbje fizike", tha një mjek ligjor, “së bashku me plagë të shumta, veçanërisht në shpinë, me shumë gjasa të shkaktuara me gërshërë”. /Telegrafi/
