Presidenti i SHBA-së, Joseph Biden dhe Kancelarja gjermane, Angela Merkel diskutuan sot marrëdhëniet midis dy vendeve në Uashington.

Para së gjithash, në lidhje me ndryshimet rreth tubacionit të gazit Nord Stream 2 dhe qëndrimet ndaj Kinës.

Gjatë një takimi të shkurtër me gazetarët, dyshja u përpoqën të zvogëlonin dallimet ekzistuese.

Biden tha se “bashkëpunimi midis Shteteve të Bashkuara dhe Gjermanisë është i fortë”, dhe Merkel, e cila kishte marrëdhënie të këqija me paraardhësin e tij, Donald Trump, tha se ajo ishte “shumë e lumtur për të thelluar marrëdhëniet” midis dy vendeve.

Merkel, e cila erdhi për një vizitë lamtumire në Uashington, pasi po tërhiqet nga politika pas zgjedhjeve të shtatorit, u shprehu ngushëllimet familjeve të vrarëve në përmbytjet shkatërruese që goditën Gjermaninë dhe Belgjikën.

Trazirat në marrëdhëniet midis Berlinit dhe Uashingtonit janë shkaktuar prej vitesh nga tubacioni i gazit Nord Stream 2, i cili do të sjellë gaz natyror nga Rusia në Gjermani.

Uashingtoni e kundërshton atë tubacion dhe u përpoq të parandalonte realizimin e këtij projekti, duke deklaruar se do të rrezikojë sigurinë energjetike të Evropës sepse do të rrisë varësinë e kontinentit nga gazi rus dhe do t’i mundësojë Moskës rritjen e presionit politik mbi Poloninë dhe Ukrainën.

Sidoqoftë, Biden kohët e fundit zemëroi shumë anëtarë të Kongresit të SHBA-së, si demokratë ashtu edhe republikanë, duke përjashtuar nga sanksionet njësitë gjermane që marrin pjesë në projektin Nord Stream 2. /Telegrafi/