Pengimi i gazetarëve në fushatë, PZAP gjobit Vetëvendosjen me 8 mijë euro

Paneli Zgjedhor për Ankesa dhe Parashtresa (PZAP) ka vendosur të dënojë Lëvizjen Vetëvendosje (LVV) me një gjobe totale prej 8 mijë euro për dy raste të ndryshme të pengimit të gazetarëve gjatë fushatës zgjedhore.

Në një nga rastet, LVV-ja është dënuar me 5 mijë e 500 euro për pengimin e gazetarëve në tubimin e saj në Malishevë, të mbajtur më 25 janar 2025.

Ankesën për këtë incident e kanë paraqitur Partia Demokratike e Kosovës (PDK) dhe Aleanca për Ardhmërinë e Kosovës (AAK), bashkë me partnerët e tyre në koalicion.

Sipas ankuesve, zyrtarë të LVV-së gjatë këtij tubimi i janë drejtuar një gazetare me fjalët: “Çka keni lyp me ardh k’tu? Ju jeni ma zi se të Serbisë”, dhe për të penguar prezencën e tyre në fushatë, kanë kërkuar leje specifike. LVV-ja ka një afat prej 15 ditësh për të paguar gjobën.

Lëvizja Vetëvendosje, e cila është gjobitur në këtë rast, ka kundërshtuar ankesën, duke argumentuar se ajo mbështetet vetëm në pohime tekstuale dhe jo në prova konkrete.

LVV-ja theksoi se nga provat materiale është evidentuar vetëm njoftimi për tubimin e mbajtur nga ana e tyre.

Vendimin e plotë të PZAP-së mund ta lexoni KËTU.

Përveç kësaj, LVV-ja është dënuar edhe me një gjobe prej 2 mijë e 500 euro për një rast tjetër të pengimit të gazetarëve gjatë tubimeve elektorale.

Në këtë rast, ankesën në PZAP e ka paraqitur PDK-ja. Sipas ankuesit, organizatori i tubimit të LVV-së në Klinë i është drejtuar gazetarëve me fjalët: “Po fluturoni prej ktuhit”.

Edhe në këtë rast, Lëvizja Vetëvendosje ka kundërshtuar ankesën, duke theksuar se ajo mbështetet vetëm në pohime tekstuale dhe jo në prova materiale. LVV-ja vuri në dukje se e vetmja provë e disponueshme është njoftimi për tubimin e mbajtur nga ana e tyre.

Vendimin e plotë të PZAP-së mund ta lexoni në këtë KËTU.

Për zgjedhjet parlamentare të 9 shkurtit 2025, janë certifikuar 28 subjekte politike me një total prej 1,280 kandidatësh.