PDK reagon lidhur me marrëveshjen për energji: Kurti më 2015 e konsideronte tradhti kombëtare, të sqaroj a e ka pasur gabim atëherë apo tash

Nënkryetarja e PDK-së, Vlora Çitaku ka reaguar pas arritjes së marrëveshjes Kosovë-Serbi për çështjen e energjisë.

Çitaku në një postim në Facebook, ka shkruar se pa i hequr asnjë pikë e presje, Kurti qenka dakorduar për planin e zbatimit të marrëveshjes për energji të dakorduar në Bruksel me 2015.

“Po të njëjtën marrëveshje, Kryeministri atëbotë e konsideronte tradhti kombëtare. E vetmja gjë konsistente tek Kurti është mungesa e konsistencës. Kryeministri ua ka borxh votuesve të tij një sqarim, a e ka pas gabim atëherë, apo e ka gabim tash?”, ka shkruar Çitaku.

Lexo po ashtu Bislimi flet pas marrëveshjes për energjinë: Tashmë komunat veriore do të faturohen sipas ligjeve dhe sistemimit rregullativ të Kosovës

Ajo ka theksuar më tej se kryeministri është shndërruar në noter të marrëveshjeve paraprake, duke e kthyer procesin mbrapa e duke humbur kohë.

Në kuadër të marrëveshjes së arritur,  janë nëntë pika gjithsej, ku ndër të tjerash është bërë e ditur se do të faturohet edhe shpenzimi i energjisë elektrike për serbët në veri.

“Brenda 10 ditëve nga lëshimi i licencës për furnizim, Elektrosever do të nënshkruajë marrëveshjet e nevojshme teknike me KOSTT-in dhe KEDS-in për të operuar në tregun e energjisë së Kosovës, gjegjësisht Marrëveshjen Kornizë për pranimin e rregullave të tregut të energjisë elektrike me KOSTT-in, Marrëveshjen për Detyrimin e bilancit me KOSTT-in, Marrëveshjen e Kyçjes me KEDS-in dhe një marrëveshje komerciale me KEDS-in për ofrimin e shërbimeve të shpërndarjes (faturimi, arkëtimi, mirëmbajtja dhe kyçja fizike e konsumatorëve të rinj) në katër komunat veriore me shumicë serbe, sipas paragrafit 1 të nenit. 5 të Marrëveshjes 2013”, thuhet në marrëveshjen e arritur në mes Kosovës dhe Serbisë. /Telegrafi/