Pas vaksinimit, britanikët do të marrin kartë imuniteti COVID

Pas vaksinimit të coronavirusit, të gjithë britanikët do të marrin një kartë identiteti COVID, e cila në të vërtetë do të jetë një dokument zyrtar që konfirmon se janë vaksinuar.

Kartat do të tregojnë emrin dhe mbiemrin e marrësit të vaksinës, llojin e vaksinës që mori, si dhe datën e imunizimit. Kartat do të shërbejnë gjithashtu si një kujtesë e dozës së dytë të vaksinës, raporton dailymail.

Punëtorët shëndetësorë në Mbretërinë e Bashkuar janë përgatitur për fillimin e vaksinimit masiv në ditët e fundit. Britanikët do të marrin dozat e para të vaksinës, të zhvilluara nga kompanitë farmaceutike BioNTech dhe Pfizer, nesër, 8 dhjetor.

Vaksinimi do të fillojë vetëm shtatë ditë pasi vendi u bë i pari që miratoi zyrtarisht përdorimin emergjent të vaksinës së coronavirusit, transmeton Telegrafi.

Në valën e parë, vaksina do t’u jepet njerëzve mbi moshën 80 vjeç, punonjësve të kujdesit shëndetësor me rrezik më të madh të infeksionit dhe stafit të shtëpive të pleqve në rreth 50 spitale në të gjithë Anglinë. Pas kësaj, vaksinimi i pacientëve më të rrezikuar do të fillojë në qendrat shëndetësore lokale.

Lexo po ashtu Sa zgjat efekti i vaksinës COVID-19?

Marrësit e vaksinës Pfizer do të marrin dy doza të vaksinës të ruajtura në një temperaturë prej minus 70 gradë Celsius, me ndarje prej tre javësh.

Kujtojmë që Mbretëria e Bashkuar deri më tani ka porositur 40 milionë doza të vaksinës Pfizer, e cila është e mjaftueshme për të vaksinuar 20 milionë njerëz, ose një e treta e popullsisë së këtij vendi. /Telegrafi/