Pas përplasjes verbale me qytetarin, jep dorëheqje shefi i Gjinekologjisë në Spitalin e Vushtrrisë

Doktori Blerim Feka, shef i Repartit të Gjinekologjisë në Spitalin e Vushtrrisë, ka dhënë dorëheqje nga pozita e tij dhe nga detyra e mjekut në këtë spital, pas përplasjes verbale me familjarin e një pacienti.

Lajmin për Telegrafin e ka konfirmuar Drejtoria e Spitalit të Vushtrrisë, përmes një përgjigjeje me shkrim.

“Dr. Blerim Feka, ka dhënë dorëheqje të parevokueshme nga detyra e mjekut specialist dhe e ka njoftuar Spitalin për shkëputjen e Kontratës së punës për arsye personale. Spitali nuk është i njoftuar për probleme të mëhershme. Për këtë ju lutem drejtojuni policisë”, thuhet në përgjigjen e tyre.

Ndryshe, në një video-incizim që është shpërndarë në rrjetet sociale, doktori Blerim Feka shihet duke debatuar ashpër me familjarin e një pacienti, i cili kërkon që ta lejojë ta shohë fëmijën e tij të sëmurë. Sipas qytetarit, mjeku gjinekolog nuk ka pasur sjellje të hijshme karshi gruas së tij, e cila i është drejtuar Fekës për komunikim dhe i njëjti dyshohet të ketë bërtitur nëpër spital.

Për rastin, Telegrafi ka kontaktuar Policinë në rajonin e Mitrovicës.

Zëdhënësi, Avni Zahiti ka thënë se “rasti është raportuar sot rreth orës 15:00, rasti është cilësuar si prishje e rendit dhe qetësisë”.

Ndërkaq, pas raportimit, ka reaguar edhe Shërbimi Spitalor Klinik dhe Universitar i Kosovës.

ShSKUK ka kërkuar nga spitali të merren masa urgjente ndaj mjekut konform të gjeturave dhe legjislacionit në fuqi.

Për sjelljen jo të mirë të gjinekologut Feka, kishte pasur ankesa edhe dy vite më parë. /Telegrafi/