Pas ftesës nga Specialja, Haradinaj ka një porosi për Selimin: Do të dalësh faqebardhë Rexhë

Njëri nga ish-komandantët e luftës së Ushtrisë Çlirimtare të Kosovës (UÇK), Daut Haradinaj, ka reaguar pas ftesës për intervistim të Rexhep Selimit nga Specialja javën e ardhshme në Hagë, në cilësinë e të dyshuarit.

Ish bashkëluftëtari i Selimit, Daut Haradinaj, përmes një postimi në Facebook, ka shprehur bindjen se Rexhep Selimi do të dalë faqebardhë nga ky proces.

“Do dalësh faqebardhë Rexhë, pastër si lufta e UÇK-së”, ka shkruar Haradinaj.

Ndryshe, ish-komandanti i UÇK-së Rexhep Selimi, përmes një statusi në profilin e tij në Facebook ka bërë të ditur se ka marrë ftesën nga Gjykata Speciale.

Ai ka thënë se do të paraqitet në cilësinë e të dyshuarit dhe se intervistimi do të zhvillohet gjatë javës së ardhshme në Zyrën e Prokurorit të Specializuar në Holandë.

Lexo po ashtu Rexhep Selimi ftohet nga Gjykata Speciale

Ftesë për intervistim nga Gjykata Speciale ditë më parë kanë marrë edhe kryeparlamentari në largim, njëherësh kryetari i PDK-së Kadri Veseli, kreu i Komunës së Drenasit, njëri ndër komandantët e UÇK-së në Zonën e Drenasit, Ramiz Lladrovci, dhe ish-pjesëtarët e Ushtrisë Çlirimtare të Kosovës, Xhavit Elshani, Durmish Gashi dhe Halil Çadraku, Selim Krasniqi.

Ndryshe, deputetët e Kuvendit të Kosovës më 3 gusht 2015, me shumicë votash, kanë votuar ndryshimet kushtetuese, që mundësonin themelimin e Gjykatës Speciale për krime lufte. Pas një seance maratonike, pro themelimit të Gjykatës Speciale votuan 82 deputetë, 5 ishin kundër dhe një abstenoi.

Kundër themelimit të Gjykatës Speciale ishin tri partitë politike opozitare, Lëvizja Vetëvendosje, Aleanca për Ardhmërinë e Kosovës (AAK) dhe Nisma për Kosovën.