Botë Nga Bota

Ministri i Forcave të Armatosura britanike: Një “sulm shumë vdekjeprurës” mund të ndodhë në aeroportin e Kabulit brenda pak orësh

Para 3 vitesh

Mund të ketë një sulm terrorist “të afërt, shumë vdekjeprurës” në aeroportin e Kabulit brenda pak orësh, ka paralajmëruar një ministër, shkruan BBC.

Sipas BBC, përcjell Telegrafi, ministri i Forcave të Armatosura, James Heappey, tha se kishte raporte “shumë të besueshme” për një kërcënim “të rëndë” në kryeqytet.

Ndërkohë kujton ky medium Zyra e Jashtme e Britanisë së Madhe (FCDO) lëshoi mbrëmë udhëzime të reja duke i thënë kujtdo pranë aeroportit që të “largohet në një vend të sigurt dhe të presë këshilla të mëtejshme”.

Një paralajmërim i tillë vjen në mes të një gare për të transportuar mijëra nga Afganistani para se të largohen trupat e huaja.

SHBA ka vendosur një afat deri më 31 gusht për tërheqjen e trupave të saj, me presidentin Joe Biden që refuzon thirrjet e kryeministrit Boris Johnson dhe aleatëve të tjerë për një zgjatje të afatit.

Heappey nuk dha një datë për fluturimet e fundit të evakuimit në Mbretërinë e Bashkuar, por tha se ka të ngjarë që Mbretëria e Bashkuar dhe trupat e tjera të huaja do të duhet të largohen para transportit ajror të fundit amerikan.

Aeroporti i Kabulit aktualisht mbrohet dhe drejtohet nga SHBA, e cila ka 5.800 trupa në terren – me ndihmën e më shumë se 1.000 trupave britanike.

Në azhurnimin e lëshuar të mërkurën në mbrëmje, FCDO gjithashtu paralajmëroi se udhëtimi me rrugë ishte “jashtëzakonisht i rrezikshëm” me njerëzit që pretendohet se ishin “keqtrajtuar” gjatë rrugës për në aeroport, përcjell Telegrafi.

Në anën tjetër SHBA i këshilloi amerikanët në Afganistan të mos udhëtojnë ose të mblidhen në aeroport “për shkak të kërcënimeve të sigurisë jashtë portave”.

Australia gjithashtu ka lëshuar një alarm, duke u thënë atyre që janë jashtë aeroportit të largohen menjëherë.

Duke folur për programin e sotëm të BBC Radio 4 të enjten, Heappey citohet të ketë thënë: “Tani ka një raportim shumë, shumë të besueshëm të një sulmi të afërt dhe prandaj këshillat e Zyrës së Jashtme u ndryshuan mbrëmë”.

Ai më vonë i tha BBC Breakfast: “Besueshmëria e raportimit tani ka arritur në fazën ku ne besojmë se ka një sulm shumë të afërt, shumë vdekjeprurës të mundshëm brenda Kabulit”.

I pyetur nga Sky News nëse një sulm mund të ndodhë në orët e ardhshme, Heappey u përgjigj: “Po”.

Duke theksuar natyrën “e rëndë” të kërcënimit, ai i tha BBC se ishte krijuar një “situatë jashtëzakonisht sfiduese, si në terren ashtu edhe si një grup vendimesh që duheshin marrë”.

“Njerëzit janë të dëshpëruar, njerëzit gjithsesi kanë frikë për jetën e tyre, dhe kështu që unë mendoj se ka një dëshirë të madhe mes shumë njerëzve në radhë për të kapur shanset e tyre”, tha ai.

Ndërkohë kolonel Richard Richard, ish-kreu i forcave britanike në Afganistan, tha se rreziku i një sulmi terrorist ishte i pranishëm që nga fillimi i përpjekjeve për evakuim. /Telegrafi/