Panxha: Prodhimeve vendore nuk u jepet hapësirë në treg (Video)

Drejtori ekzekutiv i Klubit të Prodhuesve të Kosovës, Astrit Panxha, në një intervistë për Telegrafin, me gazetarin Lulzim Ahmeti, ka thënë se prodhimet vendore kanë cilësi për të qenë është më prezentë në treg.

Por sipas tij, disa supermarkete nuk janë duke i dhënë hapësirën e duhur prodhimeve vendore dhe kjo e pengon depërtimin e tyre më të madh në treg.

“Si Klub i Prodhuesve kemi realizuar një studim, ku është gjetur se 90 për qind e produkteve në supermarkete janë të importuara dhe vetëm 10 për qind janë produkte vendore. Produktet vendore kanë cilësi, vet fakti që janë në treg të Kosovës tregon se i kanë kaluar disa analiza. Nuk duhet të diskutohet cilësia e produkteve vendore, por nuk mund ta krahasojmë një lëng i cili kushton 2.50 euro, me një lëngë që kushton 50 cent, normalisht që dallojnë në kualitet, por i plotësojnë kushtet për treg”, ka shtuar Panxha.

Ai në këtë intervistë ka folur edhe për gjendjen aktuale të bizneseve në vend, për të cilën ka thënë se nuk është e kënaqshme.
Klubi i Prodhuesve të Kosovës, tregon ai ka realizuar tash e dy vjet kampanjën “Made in Kosova” për të treguar se në Kosovë punohet e prodhohet dhe mund të arrihet suksese.

Astrit Panxha thekson se Qeveria Haradinaj ka bërë disa hapa pozitiv në drejtim të fuqizimit të bizneseve vendore.

“Gjendja e bizneseve nuk është për tu marrë shembull në rajon. Por në periudhën e fundit kemi lëvizje pozitive. Viti 2017 ka qenë i vështirë për bizneset prodhuese, sepse fokusi ka qenë në dy fushatat zgjedhore”, ka thënë ai.

Drejtori ekzekutiv i Klubit të Prodhuesve të Kosovës, Astrit Panxha, ka tha se mungesa e furnizimit stabil me energji eklektike është duke u krijuar humbje milionëshe bizneseve.

“Kërkesat e prodhuesve janë të rregullohet tregtia e brendshme si dhe të eliminohen barrierat e tjera. Vetëm nga ndërprerja e energjisë elektrike, humbjet e bizneseve janë rreth 300 milionë euro në vit”, thotë ai.

Panxha e ka mirëpritur marrjen e masave mbrojtëse nga Ministria e Tregtisë dhe Industrisë, për miellin dhe bllokat ndërtimor, por lista duhet të zgjerohet edhe me produkte të tjera.

Ai ka folur edhe për bashkëpunimin tregtar më Shqipërinë si dhe pengesat që i bëhen bizneseve të të dyjave vendeve. /Telegrafi/