Izraeli e ka bllokuar për gati tre muaj ndihmën humanitare për banorët e Rripit të Gazës, gjë që ka shkaktuar rrezikun e një epidemie urie.
Fëmijët kanë qenë në rrezikun më të madh dhe, sipas institucioneve palestineze, disa prej tyre kanë humbur jetën për shkak të urisë.
Sa shumë i nevojitet ushqimi banorëve të Gazës shihet qartë në një video të regjistruar dje në kampin Nuseirat, në pjesën qendrore të Gazës.
Pamjet tregojnë turma njerëzish përpara një furre, që përpiqen të sigurojnë bukë. Shumë prej tyre janë detyruar të luftojnë fjalë për fjalë për një bukë të mbështjellë në qese plastike.
Duhet theksuar se Izraeli ka lejuar një ndihmë të kufizuar humanitare. Ajo është transportuar me 100 kamionë, falë ndërmjetësimit të Kombeve të Bashkuara dhe organizatave të tjera.
Ndihma përfshin miell, ushqim për foshnja dhe pajisje mjekësore. Ushtria izraelite i ka kontrolluar të gjithë këta kamionë përpara hyrjes së tyre në Gaza.
Sipas vlerësimeve të OKB-së, Gazës – e cila po përjeton vitin e dytë të luftës së nisur nga Izraeli – i nevojiten çdo ditë nga 500 deri në 600 kamionë ndihme. /Telegrafi/
