Vendosën telefona para objektit të EULEX-it, veteranët e luftës protestuan kundër bastisjeve së ish-ushtarëve të UÇK-së

Organizata e Veteranëve të Luftës së UÇK-së, ka protestuar sot para zyrave të EULEX-it në Fushë-Kosovë.

OVL-UÇK ka thirrur këtë protestë për të kundërshtuar veprimet e fundit të Zyrës së Prokurorit të Specializuar në Hagë.

Lexo po ashtu Me urdhër të Speciales i konfiskohet telefoni vëllait të Salih Mustafës

Ushtruesi i detyrës së kryetarit të OVL të UÇK-së, Faton Klinaku, në fjalën e tij gjatë protestës tha se Dhomat e Specializuara të Kosovës po gjykojnë vetëm shqiptarët, transmeton Telegrafi.

“Dhomat e specializuara të Kosovës gjykojnë vetëm shqiptarët por jo krimet e kryera në Kosovë, jo krimet që i kanë shkaktuar pushtuesit serb civilëve. Ata gjykojnë luftën tonë çlirimtare, gjykojnë vetëm UÇK-në, duke quajtur ndërmarrje të përbashkët kriminale”.

Tutje, Klinaku kërkoi nga Policia që mos të lejojë zyrtarët e Speciales që të hyjnë në shtëpi dhe të kryejnë bastisje.

Ndryshe, para disa ditësh me urdhër të Dhomave të Specializuara, EULEX  ka bastisur shtëpinë e ish-luftëtarit të UÇK-së, Behar Berisha.

Ndërkaq ditëve të fundit u ka sekuestruar telefonat personal ish-komandantit të Zonës Operative të Llapit, Rrustem Mustafa – Remit, ish-të burgosurit politik, Nait Hasanit, vëllait të luftëtarit të UÇK-së, Sali Mustafës, si dhe ka bastisur shtëpinë e heronjve Fahri e Bahri Fazliu. /Telegrafi/