LAJMI I FUNDIT:

Osmani dhe Georgieva diskutojnë për situatën ekonomike të Kosovës dhe bashkëpunimin me FMN

Osmani dhe Georgieva diskutojnë për situatën ekonomike të Kosovës dhe bashkëpunimin me FMN

Presidentja e Kosovës, Vjosa Osmani gjatë takimit me drejtoreshën menaxhuese të Fondit Monetar Ndërkombëtar (FMN), Kristalina Georgieva njoftohet se është diskutuar për situatën ekonomike në vend dhe mundësitë e bashkëpunimit me këtë organizatë.

Sipas njoftimit, në margjinat e Forumit të Dohas, gjatë takimit është biseduar për raportet dhe bashkëpunimin e Kosovës me FMN-në, situatën e gjithëmbarshme ekonomike si dhe efektet potenciale ekonomike të agresionit rusë në Ukrainë.

“Presidentja Osmani informoi drejtoreshën menaxhuese të FMN për zhvillimet në Kosovë dhe rajon, me theks të veçantë në hapat që po ndërmerr vendi për të ruajtur stabilitetin politik dhe ekonomik, përballë sfidave aktuale botërore të krijuara nga lufta agresive e Rusisë kundër Ukrainës. Osmani shprehu falënderim për angazhimin e Fondit Monetar Ndërkombëtar në Kosovë dhe rikonfirmoi rëndësinë që vendi i kushton bashkëpunimit me FMN-në”, thuhet në njoftim.

Në anën tjetër, Georgieva ka vlerësuar progresin e gjithëmbarshëm të Kosovës, duke theksuar posaçërisht stabilitetin ekonomik dhe fiskal të vendit. Në fund, ajo ka ritheksuar përkushtimin për vazhdimin dhe thellimin e komunikimit dhe bashkëpunimit në mes të FMN-së dhe Kosovës. /Telegrafi/