O’Brien pas takimit me Vuçiqin: Shpresoj që komuniteti ndërkombëtar do të bëjë gjithçka që Kosova të themelojë Asociacionin

Ndihmës Sekretari i Byrosë për Çështje Evropiane dhe Euroaziatike të Departamentit amerikan të Shtetit, James O’Brien po qëndron për një vizitë zyrtare në kryeqytetin serb, Beograd.

Zyrtari amerikan ka pasur një takim me presidentin e shtetit serb, Aleksandar Vuçiq, ku temë e diskutimeve ishte edhe normalizimi i marrëdhënieve mes Kosovës dhe Serbisë si dhe çështja e themelimit të Asociacionit të komunave me shumicë serbe.

“Kosova premtoi se do ta zbatojë obligimin për themelimin e Asociacionit e komunave me shumicë serbe dhe kjo është e një rëndësie kyçe për serbët…Nëse ka shqetësim se komuniteti ndërkombëtar nuk po përmbush obligimin për të ndihmuar në këtë çështje, unë shpresoj që ne do të bëjmë gjithçka që kemi në dorën tonë për të ndihmuar në përmbushjen e premtimit ndaj vetes dhe të tjerëve. Politika ndërkombëtare ndaj serbëve në Kosovë qëndron në themelimin e Asociacionit”, tha O’Brien, raporton b92.

Vuçiq dhe O’Brien kanë pikëpamje të ndryshme sa i përket Kosovës, por pajtohen në një pikë – Asociacionit.

“I jam mirënjohës O’Brienit, i cili tha fuqishëm se Prishtina duhet ta përmbushë obligimin për themelimin e Asociacionit. Ky obligim ka qenë i madh dhe i fortë për 11 vjet. Të dyja, Prishtina dhe evropianët po na gënjejnë. Serbët kanë përmbushur të gjitha zotimet nga Marrëveshja e Brukselit, e përcaktuar edhe nga Marrëveshja e Ohrit. Probleme të reja po i imponohen popullatës serbe, duke filluar me heqjen e dinarit”, tha presidenti serb.

Ndryshe, në kuadër të dialogut për normalizimin e raporteve, që ndërmjetësohet nga Bashkimi Evropian, Kosova dhe Serbia kanë arritur marrëveshje më 2013 dhe më pas më 2015 për themelimin e Asociacionit. /Telegrafi/