Nurellari: Në Kosovë kishte pritje të ekzagjeruara për Samitin e Berlinit (Video)

Këshilltari i kryekuvendarit Kadri Veseli, Adri Nurellari ka thënë se është gabim që për pa aftësinë tonë të presim që çështjet të na zgjidhte Samiti i Berlinit

Nurellari, në “Debat Plus” me Ermal Pandurin në RTV Dukagjini ka thënë se në Kosovë kishte pritshmëri të gabuara nga Samiti i Berlinit për shumë arsye.

“Së pari ishte pritshmëri e gabuar pasi ishte në prag të zgjedhjeve të Parlamentit Evropian. Kështu që asnjë gjë e rëndësishme nuk mund të vendosej në atë samit që mund të penelizonte më pas rezultatin e zgjedhjeve [të Merkel dhe Macron]. Kemi një lojë ndjeshmëri ndaj emigrantëve, ndjeshmërie të tepruar ndaj zgjerimit të Bashkimit Evropian, kemi një rritje të islamofobisë…”, tha ai, përcjell Telegrafi.

Këshilltari i kryekuvendarit Kadri Veseli, ka thënë se nuk mund të pritej diçka e madhe pasi Merkel dhe Macron janë aktor të pjekur politikisht që të mos marrin vendime që mund të kishin ndikim në zgjedhje.

Ai ka thënë se Kosova kohët e fundit është shndërruar në një shkas për përplasje gjeopolitike të forcave të mëdha.

“Nuk do të kishte një zhvillim domethënës në atë samit në mungesë të Shteteve të Bashkuara të Amerikës. Në mungesë të miqve amerikanë nuk duhet të kishte ndonjë pritshmëri të madhe. Për këtë arsye unë nuk shoh ndonjë zhgënjim nga samiti i Berlinit”.

Lexo po ashtu Halimi: Amerika dhe Rusia pajtohen që Kosova e Serbia të shkëmbejnë territore dhe të njohin njëra-tjetrën (Video)

Nurellari ka thënë se një zhvillim pozitiv nga ky samit, ishte se presidenti francez, Macron, kishte kthyer vëmendjen nga Ballkani.

“Në Samitin e Sofjes, Macroni ishte më skeptiku dhe më indiferenti ndaj zhvillimeve të Ballkanit perëndimor, duke u marrë vetëm me agjendën e çështjeve të brendshme”, tha ndër të tjera Adri Nurellari./Telegrafi/