Numri i të infektuarve me coronavirus në SHBA ka shkuar mbi 500, në Shqipëri konfirmohen dy rastet e para – një shtetas gjerman ndërron jetë në Egjipt

Coronavirusi po vazhdon të përhapet nëpër botë. Numri i të infektuarve në mbarë botën ka shkuar në 110 mijë, derisa më shumë se 3.800 persona kanë humbur jetën.

Singapori do ta lejoj anijen “Costa Fortune” të ndalet në këtë qytet-shtet, pasi i ishte ndaluar në ndalet në portet e Tajlandës dhe Malajzisë nga frika e përhapjes së coronavirusit, transmeton Telegrafi.

Kompania italiane “Costa Crossiere”, ka bërë të ditur se nuk ka persona që dyshojnë se mund të jenë prekur nga coronavirusi në mesin e pasagjerëve në anije, ku ka edhe shtetas italianë.

Në anën tjetër në Itali janë regjistruar 7.375 të infektuar, që e bën vendin me numrin më të madh të infektuarve me virus jashtë Kinës.

Ndërkaq në Shqipëri janë konfirmuar dy rastet e para, bëhet fjalë për babë e bir që janë kthyer në Italia. Gjendja e tyre shëndetësore po vlerësohet të jetë stabile dhe pa ndonjë komplikim. Deri më tani në Shqipëri janë testuar 60 persona.

E presidenti portugez Marcelo Rebelo de Sousa, ka anuluar të gjitha takimet për dy javët e ardhshme, duke u zotuar se do të qëndrojë i mbyllur në shtëpi për shkak të epidemisë së coronavirusit.

Zyra e De Sousa, 71-vjeç, ka bërë të ditur se presidenti nuk ka simptoma të sëmundjes, por se ka vendosur të vetëizolohet me qëllim që të jetë shembull për të tjerët se duhen ndërmarrë masa preventive – duke vazhduar obligimet e tij nga shtëpia.

Në Egjipt nga coronavirusi ka vdekur një person, fjala është për një turist 60-vjeç nga Gjermania. Ai kishte hyrë në Egjipt shtatë ditë më parë dhe ishte hospitalizuar në spital në Hurgad.

“Personi që ka vdekur nga COVID-19 është shtetas gjerman, i cili ka pasur simptoma të infeksionit para se vinte në Luksoz të Hurgadit”, ka deklaruar ministri i Shëndetësisë, Kaled Mogahed.

Numri i të infektuar me coronavirus në Shtetet e Bashkuara ka shkuar në mbi 500. Sipas zyrtarëve të vendit, në SHBA janë konfirmuar 512 raste me coronavirus.

Nga ky numër, 49 prej tyre kanë ardhur nga Wuhani, Kinë dhe nga anija “Diamond Princess”. Rastet me virusin vdekjeprurës janë zbuluar në 33 shtetet amerikane. /Telegrafi/