Numër i madh i vrasjeve dhe grabitjeve të armatosura në Kosovë, ekspertja e sigurisë tregon pse po ndodhë kjo

Ekspertja e sigurisë, Besa Kabashi-Ramaj në një intervistë të dhënë për Telegrafin ka folur për gjendjen e sigurisë në Kosovë, numrin e madh të vrasjeve dhe grabitjeve të armatosura. 

Ajo ka numëruar faktorët kryesorë të cilët kanë ndikuar në këtë bilanc të krimeve, ku vetëm gjatë gjashtë muajve të parë të vitit 2019 kanë ndodhur 12 vrasje.

“Përgjegjësia që kanë institucionet e vendit është që të konsolidohen deri në atë nivel që rastet e tilla të trajtohen jo vetëm pasi të ndodhin, por edhe me arrit me i parandalu, pjesa tjetër është pjesa shoqërore, lodhja sociale që janë duke e përjetuar populli kosovar, gjendjen në të cilën gjinden, natyrisht munden të përshpejtojnë të rritet niveli i rasteve të tilla”, ka thënë ajo.

Ajo shtoi se puna e Policisë së Kosovës është e pamjaftueshme nëse prokuroria dhe sistemi i drejtësisë nuk i kryejnë punët e veta.

“Në fakt ka vite të tëra që disa sfida vetëm janë përmend nga personat që punojnë në polici e gjyqësor, siç është mungesa e data bazave të përbashkët.

Institucionet shtetëror, nëse nuk kemi një sistem të drejtësisë që është funksional dhe nuk i trajton rastet siç duhet, atëherë mesazhi që dërgohet tek personat që kanë tendenca me kry akte të tilla, është mesazh i rrezikshëm”, deklaroi ajo.

Kabash-Ramaj tha se siguria publike në përgjithësi është e lartë, por që rastet e fundit kanë të bëjnë me sistemin e drejtësisë.

“Raportet e Kombeve të Bashkuara tregojnë që Ballkani Perëndimor për siguri publike qëndron shumë mirë , por nuk qëndron mirë në aspekte tjera, rastet e fundit ja vlejnë me u adresu edhe prej aspekteve tjera, pse kanë ndodhë  pra s’kanë të bëjnë me sigurinë publike por ka të bëjë me funksionimin e sistemit të drejtësisë”, u shpreh ajo.

Ajo tha se qytetarët kanë humbur besimin në sistemin e drejtësisë, dhe se tani është sfidë të dëshmohet tek qytetarët se nuk duhet ta marrin vetë drejtësinë në duar./Telegrafi/