Një robot që “vret viruset” është duke u testuar në aeroplanët zviceranë

Një robot që “vret viruset” me dritë ultraviolet është duke u testuar në aeroplanët zviceranë në mënyrë që të rikthejë besimin e pasagjerëve dhe të ringjallë industrinë e aviacionit që po vuan pasojat e pandemisë COVID-19.

Reuters raporton se kompania zvicerane “UVeya” aktualisht po kryen prova të tilla të robotit të saj me kompaninë e aeroportit “Dnata” në aeroplanët “Embraer” “Helvetic Airways”, një kompani ajrore charter në pronësi të miliarderit zviceran Martin Ebner.

“Prodhuesit e aeroplanëve duhet të certifikojnë më tej këto pajisje dhe të studiojnë ndikimin e dritës së tyre UV në veshjet e brendshme, të cilat mund të zbehen pas shumë dezinfektimesh”, tha bashkëthemeluesi i “UVeya” Jodoc Elmiger, sipas agjencisë.

Ai shpreson që robotët e tyre pastrues mund të zvogëlojnë frikën e njerëzve nga fluturimi, edhe kur COVID-19 po qarkullon, sepse, siç tha ai, kjo është një teknologji e provuar që është përdorur për më shumë se 50 vjet në spitale dhe laboratorë dhe është shumë efikase dhe nuk lë gjurmë.

Elmiger deklaroi se një robot mund të dezinfektojë një aeroplan për 13 minuta nga fillimi deri në fund, dhe avionëve më të mëdhenj do t’ju duhet më shumë kohë.

Reuters raporton se ekipi i tij ka bërë tre prototipa deri më tani, njëri prej të cilëve u demonstrua në një aeroplan të Helvetica në aeroportin në Cyrih, ku trafiku ra me 75 për qind vitin e kaluar.

Drejtuesit e “Dnata” shpresojnë që prodhuesit e avionëve t’i miratojnë këta robotë dhe Elmiger vlerëson se çmimi i tyre mund të jetë rreth 15.000 franga zviceranë, pasi qeveritë po kërkojnë zbatimin e masave të reja për të siguruar që pasagjerët në aeroplan të mbrohen nga infeksioni, deklaron agjencia. /kp/Telegrafi/