Një grup sportistësh të famshëm nga Irani krijuan një precedent në botën e futbollit dhe i kërkuan FIFA-s që të përjashtonte kombëtaren e tyre nga Kupa e Botës në Katar.
Kupa e Botës, e planifikuar për në nëntor dhe dhjetor të këtij viti, po afrohet dita-ditës dhe në adresën e FIFA-s ka mbërritur një letër e papritur, ku kërkohet që kombëtares së Iranit t'i ndalohet pjesëmarrja për shkak të "brutalitetit dhe armiqësisë" ndaj popullit të vet.
Në letër thuhet gjithashtu se grave u është mohuar hyrja në stadiume prej vitesh.
"Brutaliteti i Iranit ndaj popullit të tij ka arritur një pikë kthese. Futbolli duhet të jetë një vend i sigurt për të gjithë, por këtu nuk është i sigurt për gratë, madje në disa raste edhe për burrat. Grave u mohohet vazhdimisht qasja në stadiume dhe përjashtohen sistematikisht nga futbolli, i cili kundërshton standardet e FIFA-s”, thuhet në letër.
Protestat në Iran filluan më 16 shtator pas vdekjes së 22-vjeçares Mahsa Amini, e cila më parë ishte arrestuar për mbajtje të pahijshme të hixhabit. Më shumë se 100 persona humbën jetën gjatë protestës.
Ndërkohë, është zbuluar se kush e ka dërguar letrën në adresën e FIFA-s. Këta janë atletë të famshëm iranianë.
Ndër të tjera, janë arbitri i licencuar nga FIFA, Mohammad Reza Faghai, kampioni aziatik i xhudos, Vahid Sarlak, ish-futsalisti Shiva Amini e shumë të tjerë.
Meqë ra fjala, Irani është në një grup me Anglinë, Shtetet e Bashkuara të Amerikës dhe Uellsin në Kupën e Botës në Katar. /Telegrafi/
