Një muaj paraburgim për shoferin që goditi për vdekje një sirian në Harilaq

Gjykata Themelore në Prishtinë ka caktuar masën e paraburgimit prej një muajsh për të pandehurin V.B, i cili ka shkaktuar aksident me fatalitet në fshatin Harilaq.

Në njoftimin e bërë për media thuhet se, gjyqtarja e procedurës paraprake kërkesën e prokurorit të shtetit për caktimin e masës së paraburgimit kundër të pandehurit V.B e ka aprovuar si të bazuar dhe të njëjtit i ka caktuar masën e paraburgimit në kohëzgjatje prej një (1) muaji.

“Ekziston dyshimi i bazuar se me datë 11.03.2021, rreth orës 17:25, në rrugën Sllatinë –Magur në fshatin Harilaq, i pandehuri V.B, duke drejtuar automjetin e tij, nga pakujdesia ka rrezikuar pjesëmarrësit në komunikacion dhe ka vu në rrezik jetën e njerëzve, ashtu që duke mos e përshtatur shpejtësinë e lëvizjes së mjetit me kushtet dhe fushëpamjen e rrugës dhe duke mos pasur kujdes ndaj këmbësorëve në rrugë, e godet këmbësorin tani të ndjerin E.N.A, i cili ka qenë duke e kaluar rrugën me ç’rast ka shkaktuar aksident komunikacioni me fatalitet ku këmbësori E.N.A si pasoj e këtij aksidenti, ndërron jetë”, thuhet në njoftim.

Lexo po ashtu Vetura e godet për vdekje një shtetas sirian në Fushë Kosovë

Ndryshe, aksidenti me fatalitet ka ndodhur me datën 12 mars, rasti ka ndodhur në fshatin Harilaq të Fushë Kosovës, rreth orës 17:26. /Telegrafi/