“Një incident sigurie” – zbulohen detaje rreth ‘mbylljes për pak kohë’ të bazës ushtarake amerikane në Itali

Një bazë ajrore detare amerikane në Itali duhej të mbyllej për një kohë të shkurtër të mërkurën për shkak të një “incidenti sigurie”, ka konfirmuar Marina e SHBA-së.

Sipas Euronews, përcjell Telegrafi, Stacioni Ajror Detar Sigonella, një qendër kryesore për operacionet e NATO-s në Mesdhe, u tha anëtarëve të shërbimit të tij që të qëndronin aty ku ishin të mërkurën në mëngjes.

Në një postim në llogarinë zyrtare të faqes në Facebook, stafit në bazën në Sicili iu tha të shmangnin udhëtimin midis një kompleksi banimi dhe një pjese të bazës.

Disa orë më vonë, një postim i ri tha se alarmi kishte përfunduar rreth orës 11:25.

Një deklaratë nga baza theksoi se policia italiane dhe anëtarët e skuadrës së bombave inspektuan një paketë të dyshimtë dhe në fund “përcaktuan se nuk ishte një kërcënim”.

“Ne i jemi mirënjohës personelit tonë të Forcës së Sigurisë së Marinës për reagimin e tyre të shpejtë”, tha baza në Facebook.

Togeri i marinës amerikane Andrea Perez, një zëdhënës në bazë, konfirmoi se nuk kishte të lënduar, duke shtuar se më shumë detaje të incidentit do të publikohen të mërkurën.

NAS Sigonella është jashtë Katanias në ishullin e Sicilisë. Personeli amerikan punon atje për të identifikuar kërcënimet e mundshme raketore në rajon.

Baza gjithashtu “strehon” aeroplanë zbulues të Marinës amerikane P-8 Poseidon dhe drone MQ-4C Triton. /Telegrafi/