Një foshnjë gjendet e braktisur në temperatura deri në -20C në Siberi – në gjithë këtë histori të trishtë megjithatë ka një lajm të mirë

Një foshnjë e braktisur në temperatura deri në -20C në Siberi po ecën mirë, sipas zyrtarëve rusë.

Sipas mediave të huaja, përcjell Telegrafi, i porsalinduri u gjet nga pesë adoleshentë në një kuti vezësh në një rrugë të largët pranë fshatit Sosnovka jashtë Novosibirsk të premten, thonë raportet lokale.

Vogëlushja u dërgua me urgjencë në spital nga një prej prindërve të adoleshentëve ku u deklarua në gjendje të mirë.

Policia në kërkim të nënës ka hapur një hetim penal për tentativën e vrasjes së një të mituri.

Prindërit e adoleshentes dëshirojnë të birësojnë foshnjën, por duhet të presin nëse mund të gjenden të afërmit e saj.

Duke folur për gazetën ruse NGS, babai i një prej adoleshentëve, Dmitry Litvinov, tha se pesë miqtë kishin dalë për një shëtitje në ditën e Krishtlindjeve ortodokse.

“Veçse ishte errësirë, ata po kontrollonin duke aktivizuar dritën në telefonat e tyre, duke parë se çfarë ishte në kuti”, ka thënë Litvinov.

Brenda ishte një vogëlushe e lënë me një batanije si leckë dhe një shishe, shtoi ai.

Ai dhe bashkëshortja e tij Anna u thirrën në vendngjarje nga djali i tyre Renat dhe e çuan foshnjën me makinë në një spital të qytetit.

Frika ishte se vogëlushja, e cila besohet se ishte rreth tre ditëshe kur u gjet, mund të kishte pësuar ngrirje dhe nuk do të mbijetonte.

Me të mbërritur në spital, një mjek e ekzaminoi shpejt foshnjën dhe e ngrohi duke ia fërkuar butësisht krahët dhe këmbët, tha një deklaratë nga ministria rajonale e shëndetësisë.

Vajza filloi të “kthjellej” dhe u zbulua se ishte e shëndetshme dhe më pas u transferua në një spital për fëmijë ku po vazhdon kujdesi për të. /Telegrafi/