Një emër i ri për stolin e Përfaqësueses së Kosovës, ish-trajneri i Schalkes i propozohet FFK-së

Përfaqësuesja e Kosovës tani e disa muaj ka mbetur pa trajner, pas shkarkimit të zviceranit Bernard Challandes.

Shumë emra janë përfolur për ta marrë drejtimin e Kosovës, por deri më tani ende nuk ka asgjë.

Kryetari i Federatës së Futbollit të Kosovës, Agim Ademi ka thënë ditë më parë se mbi 50 emra të trajnerëve të njohur i janë ofruar FFK-së përmes menaxherëve të ndryshëm.

Nga Felix Magath te Gianni de Biasi apo Marco Van Basten janë disa nga emrat e përfolur.

Por së fundmi Telegrafi ka marrë vesh se në FFK-së i është prezantuar edhe një trajner me përvojë jashtëzakonisht të mirë në futbollin gjerman.

Fjala për për Jens Keller, trajnerin 51-vjeçar që ka drejtuar skuadra të mëdha në futbollin gjerman.

Keller e ka nisur te Stuttgarti, derisa ka drejtuar edhe Schalke 04, Union Berlin, Ingolstadt dhe së fundmi Nurnbergun.

Gjermani në Stuttgart qëndroi për dy muaj, ku i drejtoi ata në 13 ndeshje gjatë vitit 2010.

Ndërkohë ai mori drejtimin e Schalke 04 në dhjetor të vitit 2012 dhe qëndroi për dy vite, ku drejtoi gjigantin gjerman në 76 sfida. Pas Schalkes,

Keller shkoi në kryeqytet ku për një vit ishte në krye të Union Berlinit duke qenë trajner i tyre në 54 sfida, derisa në 12 sfida ishte trajner edhe te Ingolstadt.

Aventura e fundit e Keller ka qenë tek një skuadër legjendare gjermane si FC Nurnberg ku qëndroi për një vit dhe i drejtoi ata në 21 ndeshje.

Nga viti 2020 Keller është i papunë dhe tani po pret nëse do ta marrë drejtimin e Kosovës, pasi është një trajner që i plotëson kushtet që FFK ka kërkuar.

Telegrafi ka mësuar se tani CV e Keller është në zyrat e FFK-së dhe ai është prezantuar nga menaxheri kosovar Urim Sejdiu në bashkëpunim me Wim Vogel nga kompania e njohur menaxheriale SPM Sportmanufaktur.

Gjithsesi përpos Keller, në tavolinën e presidentit të FFK-së, Agim Ademi janë edhe shumë emra, derisa ai pritet të vendos në fillim të muajit për trajnerin e ri. /Telegrafi/