Nis numërimi i 13 mijë e 500 fletëvotimeve të ardhura me postë

Ka përfunduar procesi i rinumërimit të 314 vendvotimeve, ndërsa sot ka filluar numërimi i votave më postë.

Këtë e ka bërë të ditur për Telegrafin, Koordinatori i Qendrës së Numërimit dhe Rezultateve, Burim Ahmetaj.

Ahmeti tha se pas rinumërimit nuk vërehet ndonjë ndryshim i madh i rezultateve. Rezultatet pas rinumërimit të 314 vendvotimeve mund t’i gjeni duke klikuar KËTU.

“Procesi i rinumërimit është kompletuar mbrëmë diku rreth orës 22:00, procesi ka shkuar pak më ngadalë për shkak të pjesëmarrjes së madhe të qytetarëve në zgjedhje”, ka pohuar ai.

Ai tha se sot ka filluar procesi i numërimit të votave me postë.

Lexo po ashtu Sot pritet të përfundojë rinumërimi i 314 vendvotimeve

“Jemi në proces të numërimit. Numërimi i votave me postë besoj që do të përmbyllet nesër, dhe do t’i hapet rrugë numërimit të votave me kusht dhe të ndonjë rinumërimi eventual”, ka thënë ai.

Gjithashtu, zëdhënësi i Komisionit Qendror të Zgjedhjeve, Valmir Elezi tha për Telegrafin se do të numërohen rreth 13 mijë e 500 fletëvotime të cilat kanë ardhur përmes postës gjatë periudhës së votimit 19 shtator – 5 tetor 2019.

“Ky numërim fillon pas vlerësimit që i është bërë pakove me fletëvotime që kanë ardhur gjatë periudhës së votimit përmes postës. Vlerësimi, si proces, ka për qëllim të identifikojë një fletëvotim me personin që e ka dërguar pakon, në mënyrë që fletëvotimi të aprovohet ose refuzohet.  Kësisoj, gjatë periudhës së vlerësimit janë proceduar dhe vlerësuar 16 mijë e 189 pako të supozuara me fletëvotime, prej tyre 13 mijë 491 janë aprovuar, ndërsa 2 mijë e 698 janë refuzuar”, pohoi ai.

Elezi tregoi arsyet pse kanë refuzuar mbi 2 mijë votues.

“1 mijë e 74 persona që nuk kanë aplikuar në periudhën për t’u regjistruar si votues jashtë vendit; 204 aplikues të cilët janë refuzuar gjatë periudhës së aplikimit për t’u regjistruar si votues jashtë vendit; 62 persona të cilët janë dërguar pako me fletëvotime më shumë se një herë; 797 raste të tjera kur personat që nuk janë identifikuar që kanë dërguar fletëvotim; dhe 561 persona që nuk e kanë dëshmuar identitetin me dokumente valide të identifikimit (që kanë dërguar kopje të dokumenteve me afat të skaduar).

Sipas rezultateve preliminare të Komisioni Qendror të Zgjedhjeve, Lëvizja Vetëvendosje ka dalë e para me 25.50 për qind, e pasuar nga Lidhja Demokratike e Kosovës me 24.83 për qind. Partia Demokratike e Kosovës radhitet e treta me 21.25 për qind të votave, kurse koalicioni AAK-PSD në zgjedhjet e së dielës ka marrë 11.57 për qind./Telegrafi/