Nga përkrahja për dy Kombëtaret te sulmuesi më i rrezikshëm i kuqezinjve, Ardian Kozniku flet para përballjes Kroaci – Shqipëri

Të mërkurën me fillim nga ora 15:00 në Hamburg, Kroacia dhe Shqipëria do të luajnë ndeshjen e xhiros së dytë të Grupit B të Euro 2024.

Të dyja kombëtaret humbën në sfidat e tyre të para, ku kroatët u mposhtën 3-0 nga Spanja dhe kuqezinjtë pësuan 2-1 nga Italia.

Kroacia dhe Shqipëria do të takohen për herë të parë të mërkurën dhe nuk mund të kishte ardhur në një moment më të papërshtatshëm, pasi humbësi i këtij dueli do t’i humbas edhe gjasat për të kaluar nga grupi.

Legjenda kosovare, Ardian Kozniku i cili jeton dhe vepron në Kroaci pasi është edhe ish-reprezentues i kroatëve, ka folur për këtë duel shumë të rëndësishëm për mediumin kroat ‘Tportal.hr’.

56-vjeçari ka dhënë një intervistë do të jetë një ndeshje interesante pasi të dyja Kombëtaret kanë humbur dhe tani pret një ndeshje të hapur.

“Do të jetë interesante, sepse të dyja kombëtaret humbën në raundin e parë. Pavarësisht nëse është 3:0 ose 2:1, një humbje është humbje. Dhe për këtë pres një ndeshje të hapur, sepse të dyja kombëtaret do të shkojnë për fitore”, tha fillimisht Kozniku.

Gjakovari mendon se cilësi dhe përvoja janë në anën e kroatëve, megjithatë ata duhet të kenë shumë kujdes ndaj Shqipërisë.

“Cilësia dhe përvoja janë në anën e Kroacisë. Përveç kësaj, lojtarët kroatë, të paktën 80 për qind e tyre, kanë luajtur së bashku prej vitesh. Dhe prandaj mendoj se e “përtypën” më lehtë humbjen ndaj Spanjës. E përsëris, cilësia, individuale dhe ekipore është në anën e Kroacisë. Por patjetër duhet të jeni të kujdesshëm ndaj Shqipërisë. Por trajneri Dalic e di këtë. Por duhet ta theksoj kur të kem mundësi”.

“Të them të drejtën, edhe para Spanjës kam thënë që Kroacia do të fitojë, kam besuar në të. Duhet pranuar që nuk doli kështu, por nuk e humba shpresën. Sa i përket asaj ndeshje, spanjollët i shfrytëzuan mundësitë e tyre, kroatët jo. Por kështu është në sport. Më pas, kur një kundërshtar i tillë kalon në avantazh 3:0, e megjithatë është një kombëtare e tmerrshme, atëherë është e vështirë të rikthehesh kundër tyre. Dhe kushdo që e ka parë ndeshjen kundër Portugalisë do të kishte thënë se Kroacia do të jetë kampione e Evropës, por kjo disfatë ju ndodh. Sigurisht që pas ndeshjes ka pasur trishtim, por të gjithë janë profesionistë të lartë që nuk do të pësojnë për një humbje, sado e vështirë të jetë. Ky është sport, e nesërmja është një mundësi e re”, vazhdoi tutje Kozniku.

Tutje legjenda kosovare u pyet se nga kush duhet të kenë frikë kroatët, duke thënë se Manaj është më i rrezikshmi te Shqipëria.

“Për të mos përmendur emrat, ata janë të fortë si kolektiv. Është e vërtetë, ata nuk kanë lojtarë të klasit në sulm, si Petkoviç, Perisic, Kramariç, por gjithsesi do të përgjojnë në fillimin e rasteve nga kundërsulmi. Janë një skuadër e ekuilibruar, të gjithë mund të shënojnë gol, edhe pse tashmë janë larguar Sokol Cikalleshi dhe Myrto Uzuni. Ndoshta më i rrezikshmi është Manaj… Por në përgjithësi, Kroacia është shumë më mirë në letër”, tha Kozniku.

Kozniku tutje tha se shqiptarët nuk kanë asgjë për të humbur, duke thënë se nuk u turpëruan nga Italia.

“Shqiptarët nuk kanë asgjë për të humbur në këtë kampionat dhe mund të fitojnë shumë. Epo humbën nga Italia, por nuk u turpëruan. Askush nuk i fajëson ata për atë disfatë. Dhe gjithashtu, ata do të shkojnë në ndeshjen kundër Kroacisë të lehtësuar sepse e dinë se Kroacia është favorit në letër. Dhe kjo është më e keqja për Kroacinë, sepse shqiptarët mund të jenë surprizë”, tha Kozniku.

Edhe pse të gjithë jemi të bindur se do të ketë më shumë tifozë kroatë në stadiumin e Hamburgut, balanca e fuqive në tribuna këtë herë mund të jetë në favor të tifozëve shqiptarë.

“Ashtu siç të gjithë e duan kombëtaren e tyre, ashtu edhe shqiptarët. Sigurisht që Kroacia njihet prej shumë vitesh për ardhjet e shumta të fansave të saj. Por shqiptarët sigurisht që po përpiqen t’i arrijnë kroatët. Ky është konkursi i tyre i dytë i madh. Dhe duke qenë se të tillë janë të shumtë në Gjermani, por edhe në të gjitha vendet evropiane, është e qartë se ardhja në Euro është një përvojë e veçantë për ta. Isha në Itali në ndeshjen Itali-Shqipëri dhe në stadium për 35 mijë veta ishin 30 mijë shqiptarë. Pra do të ketë shumë të tillë në Hamburg, ku gjithsesi jeton një komunitet i madh shqiptar”, tha Kozniku.

Krejt në fund Kozniku u pyet se për kë do të bëjë tifo në këtë ndeshje, për Kroacinë për të cilën ka luajtur dhe jeton, apo për vendin e tij Shqipërinë.

“Për futbollin (ha ha)… Të gjithë e dinë që jam shqiptar nga Kosova, por e di edhe sa krenarë ishin të gjithë shqiptarët dhe kosovarët për mua kur pata mundësinë të luaja për Kroacinë. Unë kam qenë në mesin e kandidatëve për Euro në Angli, kam luajtur shtatë nga dhjetë ndeshjet kualifikuese, por kam hequr dorë për shkak të një thyerje të këmbës. Pastaj Ciro më çoi në Kupën e Botës në Francë në vitin 1998, për të cilin jam gjithashtu jashtëzakonisht krenar. Dhe të gjithë miqtë e mi e dinë se që nga viti 1990 dhe ardhja ime në Hajduk të Splitit, unë kam qenë veçanërisht i lidhur me Kroacinë. Sigurisht që do të isha më i lumtur nëse të dyja kombëtaret do të kalonin grupin dhe do të shkonin sa më larg, por duhet të jemi edhe realistë”, tha Kozniku duke mos përmendur se cilën Kombëtare do ta përkrahë në këtë ndeshje. /Telegrafi/