Nga dita e hënë kryqi i kuq fillon me shpërndarjen e të hollave të grumbulluara

Kryqi i kuq i Republikës së Maqedonisë prej të hënës do ta fillojë shpërndarjen e të hollave që janë grumbulluar nga kontributi i qytetarëve, përmes thirrjeve telefonike dhe përmes gjiro-llogarive bankare, raporton Shenja. Sekretari i përgjithshëm i Kryqit të Kuq, Sait Saiti ka thënë se shpërndarja e të hollave do të bëhet në mënyrë lineare dhe kontribut të madh në grumbullimin e të hollave kanë edhe Birraria Shkup, Banka Komerciale por edhe banka tjera, pastaj Kryqi Kuq shqiptar, bullgar dhe ai slloven. Ndërsa, kontribut për shpërndarjen e të mirave materiale të deritanishme që  më së shumti kanë dhënë janë Kryqi Kuq austriak, Italian, evropian, Federata Ndërkombëtare e Kryqi të Kuq, transmeton Telegrafi Maqedoni.

“Me mbarimin e aksionit ditën e hënë, do të konstatohet gjendja definitive dhe duke i shfrytëzuar listat të cilat ndërkohë, shpresoj se do të jenë gati. Ne do ti shfrytëzojmë listat e komisioneve përkatëse, komisioneve të autorizuara, të cilët e bëjnë vlerësimin në teren. U përcaktuam për mënyrat lineare që do  të thotë se çdo familje e prekur do të merr shumë të barabartë të të hollave”, ka thënë Saiti.

Sipas Sekretarit Saiti, shpërndarja e të hollave do të bëhet përmes xhiro-llogarive  të secilës familje, ndërsa sasia e tyre do të bëhet e ditur ditën e hënë, kur të finalizohet shuma definitive e të hollave. Ndërsa, shpërndarja lineare përveç se përfshin çdo familje, përfshin edhe çdo vend të prekur nga vërshimet e 6 gushtit, pa marrë parasysh etnitetet që banojnë aty. Sipas tij, Kryqi i Kuq në vazhdim do të realizoj edhe dy projekte tjera, që nënkuptojnë përkrahje psikologjike, psikike-sociale për personat e prekur nga vërshimet.

“Në bashkëpunim me shkollat që janë 6, në rajonet e prekura do të zhvillohen aktivitete të tilla në mënyrë plotësuese, do të formohen klube të Kryqit të Kuq, ku me fëmijët e atij rajoni do të punohet në ngritjen e vetëdijes për mbrojtje nga dukuritë natyrore…Aktiviteti tjetër do të jetë me pushtetin lokal dhe me pushtetin vendor, do të zhvillohen aktivitete që do të nënkuptojnë rritjen e rezistencës të popullatës ndaj dukurive natyrore”, ka thënë më tej ai.

Kryqi i Kuq i Republikës së Maqedonisë, deri më tani ka grumbulluar rreth 800 mijë euro, ndërsa shpërndarja e këtyre mjeteve do të do të bëhet brenda një jave. Sa i takon aktivitetit për shpërndarje të të mirave materiale do të vazhdoj edhe gjatë tre muajve të ardhshme./Telegrafi/