Netflix është paditur për serialin “Squid Game”, nën akuzat për vjedhje të skenarit nga një film indian i vitit 2009

Netflix është paditur nga aktori dhe producenti Sohum Shah, i cili pretendon se platforma e transmetimit i ka vjedhur idenë dhe skenarin nga filmi i tij i vitit 2009, “Luck”.

Seriali korean “Squid Game”, u shfaq për herë të parë në vitin 2021 dhe është bërë seriali më i shikuar në Netflix. Sezoni i dytë është planifikuar të publikohet më 26 dhjetor të këtij viti, shkruan DailyMail.

Sipas një padie të siguruar nga TMZ të premten, Shah ka pretenduar se platforma e transmetimit ka marrë skenarin nga thrilleri aksion i tij në gjuhën hindi, të cilin ai e ka shkruar vetë.

Skenari i “Luck” është: “Një mbret i botës nën-ndërkombëtare rekruton njerëz të pajisur me ‘fat’ nga e gjithë bota për të marrë pjesë në një seri sfidash të dizajnuara për të testuar faktorët e tyre të ‘Fatit’, ndërsa bastoret e botës i vëzhgojnë ata”, sipas një sinopsisi në IMDB.

Ngjashëm me “Squid Game”, karaktere ‘të dëshpëruar’ pranojnë të garojnë në lojë, por humbja e një sfide rezulton në vdekje, e cila gjithashtu rrit shumën e parave që mund të fitohet në fund të garës për ata që janë ende të gjallë.

Bastoret e të pasurve shikojnë konkurrentët duke konkurruar në lojëra të rënda – gjithashtu si në serialin e Netflix.

Shah ka pretenduar në padinë e tij se ka shkruar skenarin për “Luck” në vitin 2006 dhe filmi është publikuar më pas në kinema në vitin 2009 në vende si: India, Shtetet e Bashkuara, Mbretëria e Bashkuar dhe Emiratet e Bashkuara Arabe.

Sohum gjithashtu ka pretenduar se skenaristi i “Squid Game”, Hwang Dong-hyuk, ka thënë se ka shkruar skenarin e serialit të tij në vitin 2009 – vitin e njëjtë kur “Luck” u publikua zyrtarisht.

Përveç Netflix, Shah po padit gjithashtu Dong-hyuk.

Në padinë e tij, producenti ka deklaruar se platforma e transmetimit do të kishte mundur të shihte “Luck” kur u publikua për herë të parë për shkak të “reklamave dhe marketingut të konsiderueshëm”.

Pas suksesit global të “Squid Game”, Netflix ka rritur vlerën e tregut me rreth 900 milion dollarë (811 milionë euro).

Shah raportohet se kërkon një pjesë të kësaj vlerë – dhe gjithashtu synon të parandalojë platformën e transmetimit nga ‘shkelja’ e të drejtave të tij të autorit për “Luck”, sipas TMZ.

“Squid Game” u shfaq në shtator 2021 në Netflix dhe, përveç se u bë seriali më i shikuar i platformës së transmetimit. Seriali ka fituar 1.65 miliard orë shikimi vetëm në katër javët e para.

Skenari thotë: “Qindra lojtarë me probleme financiare pranojnë një ftesë të çuditshme për të garuar në lojëra fëmijësh. Brenda, një shpërblim tërheqës i pret ata po me sfida vdekjeprurëse: një lojë mbijetese që ka një shpërblim të jashtëzakonshëm prej 45.6 miliard won (30.9 miliardë euro)” sipas IMDB.

Seriali gjithashtu ka fituar shumë çmime pas pranimit të kritikave pozitive nga kritikët dhe fansat.

“Squid Game” ka marrë tri nominime në çmimet “Golden Globes” – me O Yeong-su që fitoi çmimin për “aktorin më të mirë në rol dytësor në një serial”.

Seriali gjithashtu ka marrë katër nominime për SAG Awards, duke fituar tre prej tyre: “Performanca më e mirë nga një aktor mashkull në një serial dramë”, “Performanca më e mirë nga një aktore femër në një serial dramë” dhe “Veshja më e mirë në një serial televiziv”.

Çmimet e tjera që “Squid Game” ka fituar përfshijnë dy çmime Emmy, dy “Critics’ Choice Television Awards” si dhe një “People’s Choice Awards”.

Seriali po sjell dy sezone të reja shtesë, me sezonin e dytë që është planifikuar të publikohet më 26 dhjetor të këtij viti.

Sezoni i tretë dhe i fundit nuk ka një datë të caktuar për publikim – por pritet premiera e tij ndoshta në vitin 2025.

Ko-CEO i Netflix, Ted Sarandos, ka vizituar vendin e xhirimeve të “Squid Game” gjatë produksionit të sezonit të dytë në Korenë e Jugut më herët këtë vit.

Sarandos shprehu në një deklaratë të ndarë në faqen e internetit të Netflix që: “Nuk mund të vizitoja Korenë pa përjetuar prodhimin e një prej serialeve tona më të pritura të vitit 2024 – sezonin e dytë të ‘Squid Game'”.

Ai vazhdoi, “Ndërsa nuk mund të ndaja ndonjë informacion të detajuar, mund të them se lojërat e reja do t’ju lënë pa fjalë, dhe isha i kënaqur nga xhirimet”. /Telegrafi/