Nedellkova: Askush nuk guxon ti kërcënojë gjykatësit me shkarkim ose rizgjedhje

Sulmet kundër gjyqësisë dhe tentativat për ndikime dhe kërcënime janë përditshmëri, ka deklaruar sot kryetarja e Gjykatës Supreme, Lidija Nedelkova, transmeton Telegrafi Maqedoni.

Sipas saj, në kohën e fundit, besimi ndaj gjyqësorit është në këmbë të qelqta. Ngjarjet janë të tmerrshme dhe të ndjeshme, ndërkaq gjyqësori është pjesë e rëndësishme e mozaikut, dhe për këtë duhet të aktualizohet çështja për pavarësinë e tij.

“Gjykatësit shpesh janë të ekspozuar ndaj ndikimeve jozyrtare dhe trysnive të formave të ndryshme nga bartës të funksioneve politike, të cilët direkt ose indirekt munden të ndikojnë në statusin dhe karrierën e tyre. Duke filluar nga personat e fuqishëm ekonomikisht, individë të interesuar drejtpërdrejt, ndërmjetësues me lidhje familjare, kolegjiale dhe profesionale”, ka thënë për mediat Lidija Nedelkova, Kryetare e Gjykatës Supreme.

Këtë deklaratë, Nedelkova e ka bërë gjatë prezantimit të “Deklaratës së Brioneve për parimet e pavarësisë së gjyqësorit”  e cila është nënshkruar nga 16 kryetarë të Gjykatave Supreme të vendeve nga Evropa qendrore dhe lindore./Telegrafi/