Në Merdar arrestohet ish-shefi i milicisë në Istog, dyshohet për krime lufte

Ish-shefi i milicisë në Istog gjatë viteve 1998-1999, M.P., është arrestuar sot në orën 18:05 në vendkalimin kufitar Medrar si i dyshuar për kryerjen e krimeve të luftës kundër popullsisë civilë në Kosovë.

Në njoftimin e Policisë thuhet se “Procesi hetimor është ndihmuar nga zyrtarët e Agjencisë së Kosovës për Inteligjencë me të cilët është bashkëpunuar ngushtë në një punë ekipore, ku është bërë përpunimi inteligjent i informatave. Nga bashkërendimi i aktiviteteve është bërë e mundur të identifikohet një i dyshuar për krime lufte, i cili në kohën e luftës 1998-1999 ishte krye-shef i milicisë në Istog”.

Më tej thuhet se hetuesit policorë nga Drejtoria për Hetimin e Krimeve të Luftës, nën autorizimet e Prokurorit të Shtetit në Prokurorinë Speciale të Republikës se Kosovës, për një periudhë kohore kanë zhvilluar veprime  hetimore, mbledhje të dëshmive e provave dhe identifikimin e  kryerësve të veprave penale  të krimeve të luftës.

“Këto hetime kanë qenë të përqendruara rreth zbulimit të autorëve të krimeve të kryera në periudhën 1998-1999 në rajonin e komunës së Istogut”, thuhet në komunikatë, transmeton Telegrafi.

Më tej thuhet se “në vazhdën e angazhimeve hetimore është arritur të mblidhen dëshmi dhe prova për krimet dhe kryesit e këtyre veprave penale. Hetuesit policorë kanë  pranuar dhe përpunuar informata të shumta operative në drejtim të identifikimit, vendndodhjes dhe lokalizimit të të dyshuarit, aktivitetit dhe lëvizjeve të  tij, në dhe jashtë territorit të Kosovës”.

Me aktvendim nga prokurori i arrestuari është dërguar në mbajtje deri në 48 orë. /Telegrafi/