Në lëvizjen e tij të fundit si president, Biden fal ata që thotë se “u shënjestruan” nga Trumpi

Presidenti i SHBA-ve përdori orët e fundit të presidencës së tij për të dhënë falje parandaluese për ata që ai i përshkroi si objektiv të “ndjekjeve të pajustifikuara dhe të motivuara politikisht”.

Presidenti në largim i SHBA-ve, Joe Biden ka falur Dr. Anthony Fauci, Mark Milley dhe anëtarët e një komiteti të Dhomës së Përfaqësuesve që hetuan trazirat e Capitol Hill më 6 janar 2021 në një lëvizje të paprecedentë që synon mbrojtjen e atyre që janë prekur nga hakmarrja e mundshme nga administrata Trump.

Biden gjatë njoftimit të faljeve deklaroi se “SHBA u detyrohet një borxh mirënjohjeje atyre që u angazhuan për vendin”.

Bëhet e ditur se vendimi ​​vjen pasi Donald Trump, i cili do të inaugurohet si president i SHBA-ve për pak orë, paralajmëroi për një “listë armiqsh” që paraqet ata që e kanë shënjestruar atë politikisht ose që kanë kërkuar ta mbajnë atë përgjegjës për rolin e tij në trazirat e Capitol Hill.

Edhe pse është zakon që një president të falë në fund të mandatit të tij, ajo zakonisht u ofrohet qytetarëve të përditshëm amerikanë që janë dënuar për krime.

Ndërsa me këtë veprim, Biden po fal individë për të cilët ende nuk është marrë ndonjë vendim, shkruan euronews, përcjell Telegrafi.

Fauci ishte këshilltari kryesor mjekësor i Biden deri në pensionimin e tij në 2022, i njohur më së miri për ndihmën për të koordinuar përgjigjen e vendit ndaj pandemisë COVID-19.

Ai ishte në shënjestër të Trumpit kur refuzoi të mbështeste pretendimet e tij për virusin.

Ndërsa Mark Milley, ish-kryetari i Shefave të Përbashkët të Shtabit, e quajti Trumpin një “fashist” dhe detajoi sjelljen e tij rreth trazirave.

Ndryshe, faljet përfshijnë gjithashtu anëtarët dhe stafin e komitetit të 6 janarit, duke përfshirë ish-përfaqësuesit Liz Cheney dhe Adam Kinzinger, të dy republikanë, dhe oficerët e policisë Metropolitane të Kapitolit të SHBA-ve.

Biden premtoi një tranzicion të qetë në administratën e ardhshme, por gjatë fjalimit të tij lamtumirës, ​​ai paralajmëroi për një oligarki në rritje të “miliarderëve të teknologjisë” në SHBA.

Me aktin e tij të fundit si president, Biden ka vendosur rekordin për më shumë falje dhe ulje të dënimeve si president.

Të premten, ai njoftoi se do të zbusë dënimet e pothuajse 2,500 personave të dënuar.

Muajin e kaluar, ai gjithashtu ua zbuti dënimet 37 nga 40 personave të dënuar me vdekje, duke i kthyer dënimet e tyre në burgim të përjetshëm në vend të ekzekutimit. /Telegrafi/