Nainggolan nuk e përjashton një rikthim sensacional te Roma: Më duan dhe i dua, kam dhënë gjithçka për Giallorosët

U bënë bashkë në vitin 2014 dhe dukej se nuk do të ndaheshin kurrë, por lidhja e fortë mes Radja Nainggolan dhe Romës nuk zgjati më shumë se pesë vite.

Mesfushori belg shumë shpejt u bë njëri nga futbollistët më të adhuruar nga Giallorosët, ku madje shpesh herë e barte edhe shiritin e kapitenit.

Por në vitin 2019 belgu vendosi t’i bashkohej trajnerit Luciano Spalletti te Interi, teksa në drejtim të Romës shkuan Nicolo Zaniolo e Davide Santon.

Qëndrimi i Nainggolan te Interi zgjati vetëm një vit, pasi me ardhjen e Antonio Contes belgu u largua në drejtim të Cagliarit.

31-vjeçari tani ka konfirmuar se dëshiron rikthimin në Romë, nëse kushtet ia mundësojnë një gjë të tillë.

“Unë do të rikthehesha në Romë nëse kushtet janë të mira, do të kthehesha përsëri”.

“Kam jetuar vite të mira te Roma, ku më duan dhe i dua, ku kam dhënë gjithçka për atë fanellë”, deklaroi Nainggolan.

Nainggolan muaj më parë kishte deklaruar se atë e larguan drejtuesit nga Roma, pasi dëshira e tij ishte të mbetej gjatë te Giallorosët.

Por tani belgu thotë se zgjodhi Interin për faktin se ata kishin trajner Luciano Spallettin.

“Ishte zgjedhja ime për t’iu bashkuar Interit, pasi ata kishin trajner Luciano Spallettin me të cilin kalove vite të mira në Romë”.

“Por nëse do të më pyesni nëse isha më i lumtur që nënshkrova me Interin apo më i trishtuar që u largova nga Roma, atëherë unë zgjedh këtë të dytën”, ka deklaruar Nainggolan.

Ka mjaftuar kjo deklaratë nga Nainggolan që tifozët e Romës të nisin me komente të shumta në rrjete sociale duke kërkuar rikthimin e tij në Olimpico. /Telegrafi/