Mustafa: Papunësia mbetet problemi më i madh në Kosovë

Kreu i LDK-së, Isa Mustafa, ka thënë se papunësia mbetet problemi më i madh në Kosovë dhe me papunësinë lidhet edhe luftimi i krimit e korrupsionit.

Përmes një shkrimi në Faceboook, ai ka theksuar se në Kosovë më shumë po rritet numri i atyre që marrin ndihma nga qeveria se i atyre që punësohen.

“Se papunësia është problemi më i madh në Kosovë, rezulton nga të gjithë treguesit, përfshirë edhe hulumtimet e opinionit. Me papunësinë lidhet edhe luftimi i krimit dhe korrupsionit, dukuri kjo ndikon negativisht në investimet në Kosovë”, ka shkruar ai.

Sipas tij, Kosova ka tema të tjera të rëndësishme, por “qytetarët e papunë dhe familjet e tyre kanë nevojë për të ardhura”.

“Kosova kishte dhe ka edhe tema tjera të rëndësishme për klasën politike, si dialogu, taksa 100%, kufijtë me Shqipërinë, organizatat ndërkombëtare, por qytetarët e saj të papunë dhe familjet e tyre kanë nevojë për të ardhura, për çmime më të ulëta, për furnizim të rregullt me energji elektrike , për arsim me të cilin gjendet punë, për kujdes cilësor shëndetësor. Politikat pasive sociale, me të cilat po blihet paqja sociale nga grupe të ndryshme të merituarish dhe të pamerituarish, sikurse edhe thellimi i hendekut të pagave ndërmjet sektorit publik dhe atij privat po ia zënë frymën sektorit privat të ekonomisë . Në vend që të rritet punësimi po rritet numri i atyre që merr ndihma nga qeveria. Kjo nuk i kontribuon rritjes reale ekonomike e cila duhet të përcillet me punësim dhe rritje të standardit të jetesës”, ka thënë ai.

“Është e domosdoshme që në këtë vit të merremi me tema që parapërcaktojnë fatin dhe ardhmërinë e qytetarëve tanë, të mendojmë më shumë për hapjen e një vendi të punës sesa për hapjen e një teme folklorike”, ka shkruar Mustafa në fund./Telegrafi