Musliu – Haxhiut pas zhdukjes së mostrave të Deharit: Mos kukat, por jep dorëheqje

Deputetja e Partisë Demokratike të Kosovës, Ganimete Musliu, ka kërkuar dorëheqjen e ministres së Drejtësisë, Albulena Haxhiu, pasi njoftoi se janë zhdukur mostrat e Astrit Deharit nga laboratori i toksikologjisë në Institutin e Mjekësisë Ligjore.

Duke iu drejtuar ministres, Musliu ka thënë partia e cila është në pushtet e aktivist i së cilës ishte Dehari, ka abuzuar me rastin e tij.

“Znj. Haxhiu lej lojërat, mos kukat, mos u viktimizo, por jep dorëheqje. Një popull e keni terrorizu duke abuzuar me rastin e Astritit deri sa keni ardhë në pushtet”.

“Nuk ka justifikime më. Nëse ke veç pak ndjeshmëri e pak moral jep dorëheqje!”, ka shkruar deputetja e PDK-së në Facebook.

Aktivisti i Lëvizjes Vetëvendosje, Astrit Dehari, u gjet i vdekur në qelinë e burgut në Prizren më 5 nëntor të vitit 2016, ku po mbahej i paraburgosur nën dyshimin se kishte kryer sulm ndaj ndërtesës së Kuvendit të Kosovës, bashkë me disa aktivistë të tjerë.

Teksa Prokuroria atë kohë pati thënë se është vetëvrasje, familja në vazhdimësi ka insistuar se bëhet fjalë për vrasje./Telegrafi/