Ministria e Punëve të Brendshme ka ngritur nivelin e gatishmërisë së kapacitetit koordinues dhe reagues, me qëllim të reagimit ndaj situatës së krijuar nga të reshurat anë e mbanë Kosovës.

“AME ka njoftuar të gjithë akterët dhe njoftimi për ngritje të nivelit të gatishmërisë i është përcjellë të gjitha Komunave- Drejtorive përkatëse për Mbrojtje dhe Shpëtim, përmes sistemit të Qendrave Operative Emergjente 112, të cilat vazhdimisht po e monitorojnë gjendjen”, ka shkruar Ministri i Punëve të Brendshme, Xhelal Sveçla në Facebook.

Sveçla ka thënë se pavarësisht se institucionet janë të gatshme për ndërhyrje nuk ka pasur ndonjë kërkesë nga komunat.

Shiu i dendur përmbyt rrugët e Prishtinës Shiu i dendur përmbyt rrugët e Prishtinës

“AME është duke e përcjellë gjendjen në vazhdimësi dhe është e gatshme për reagim me Njësitë Profesionale të Zjarrfikësve dhe Shpëtimit në Komuna. Megjithatë, deri më tani, nuk ka pranuar ndonjë kërkesë nga komunat dhe nuk ka pranuar njoftime se është shpallur gjendje rreziku nga asnjë pjesë e territorit për nivelin qendror”.

Ministri i Brendshëm thotë se pavarësisht se nuk ka pasur kërkesa nga komunat për ndërhyrje, niveli qendror është në gjendje gatishmërie që tu përgjigjet kërkesave të qytetarëve.

“MPB do të koordinojë dhe bashkëpunojë edhe me FSK-në të cilët kanë mobilizuar ekipet e tyre për reagim, andaj, apelojmë tek komunat që të adresojnë kërkesat dhe nevojën për ndihmë dhe në të njëjtën kohë apelojmë tek qytetarët, që për të evituar rreziqet të bashkëpunojnë”.

FSK ngrit gjendjen e gatishmërisë për shkak të përmbytjeve FSK ngrit gjendjen e gatishmërisë për shkak të përmbytjeve

Informimin për problem mund ta bëni në Qendrën Operative Emergjente, përmes numrit unik ( integruar) emergjent – 112 (këtë numër emergjent – 112 mund ta thirrni dhe merrni, pa prefiks, nga cilido qoftë vend apo pozitë në Republikën e Kosovës).

Gjithashtu mund të thirrni edhe në këta numra:

Njësinë më të afërt Profesionale te Zjarrfikës dhe Shpëtimit në numrin e telefonit 193,

Policinë e Kosovës, në numër të telefonit 192,

Ndihmën e shpejtë , në numër të telefonit 194./Telegrafi/