Ministria e Drejtësisë urdhëron hetimin e “darkave të pazareve të drejtorëve të burgjeve me të dënuarit…”

Ministria e Drejtësisë ka reaguar në lidhje me shkrimin e publikuar me titull “Skandaloze: Drejtorët e burgjeve në Darka të pazareve me të dënuarit për vepra të rënda penale”.

“Ministria e Drejtësisë njofton opinionin publik se pas publikimit të fotografive dhe shkrimeve në disa portale në të cilat shihen zyrtarë të Ministrisë së Drejtësisë, përkatësisht Shërbimit Korrektues të Kosovës, në shoqëri me persona të dënuar më parë për vepra penale, Ministrja e Drejtësisë, znj. Dhurata Hoxha, ka urdhëruar menjëherë inspektoratin e Ministrisë së Drejtësisë të bëjë inspektim të këtij rasti, respektivisht pretendimeve te cilat përmenden në shkrimet e portaleve”, thuhet në njoftimin e MD-së, transmeton Telegrafi.

Lexo po ashtu Drejtorët e burgjeve “shijojnë darkat” me të dënuar për vepra të rënda penale (Foto)

“Pas pranimit të raportit të Inspektoratit të Shërbimit Korrektues, në varësi nga të gjeturat dhe rekomandimet si dhe në pajtim me dispozitat ligjore në fuqi, Ministria e Drejtësisë do të ndërmarrë veprimet e duhura”.

“Ministrja e Drejtësisë, znj. Hoxha shpreh përkushtimin si dhe garanton qytetarët e Republikës së Kosovë se puna e Ministrisë së Drejtësisë dhe e institucioneve të cilat veprojnë në kuadër të saj do të jetë transparente dhe në pajtim me legjislacionin në fuqi dhe nuk do të tolerohet asnjë praktikë që nuk është në pajtim me ligjin”, thuhet në njoftim. /Telegrafi/