Ministrat e Qeverisë Kurti të painformuar për sanksionet e mundshme ndaj Kosovës

Ministrat e Qeverisë Kurti kanë deklaruar se nuk janë në dijeni që Shtetet e Bashkuara të Amerikës dhe Bashkimi Evropian po shqyrtojnë mundësinë e masave kundër Kosovës në rast se nuk përmbush detyrimet e saj dhe nuk qetëson situatën në veri të vendit.

Euronews Albania të mërkurën ka publikuar një dokument ku thuhet se parashikohen sanksione individuale ndaj kryeministrit Albin Kurti dhe ministrit të brendshëm, Xhelal Sveçla, nëse situata në terren degradon më tej. Kjo mund të përfshijë shpalljen “non grata” të dy zyrtarëve, “me justifikimin se ata janë një kërcënim për sigurinë dhe paqen”.

Lexo po ashtu Nga masat e ashpra për Kosovën te shpallja “non grata” për Kurtin dhe Sveçlën, Euronews Albania publikon pikat e sanksioneve të mundshme   

E në një konferencë për media të përbashkët me ministrin e Kulturës, Rinisë dhe Sportit, Harulla Çeku, ministri i Financave, Punës dhe Transfereve, Hekuran Murati, ka thënë se nuk është informuar prandaj edhe nuk mund të përgjigjet mbi këtë çështje, transmeton Telegrafi.

“Nuk jam në dijeni për ndonjë listë të tillë as për kredibilitetin e listave të tilla, prandaj edhe nuk mund të përgjigjem në këtë çështje”, ka deklaruar ai para gazetarëve.

Lexo po ashtu Ish-ambasadori Peci: Mirupafshim në Kosovën e izoluar dhe të bankrotuar, qysh e lypshim e gjetshim

Por sipas tij, ajo që është me rëndësi të theksohet është se “pikat ku pajtohemi dhe duhet të pajtohemi të gjithë është se legaliteti, ligjshmëria, demokracia dhe vlerat demokratike duhet të mbizotërojnë në të gjithë vendin”.

“Çështje të tjera janë çështje diskutimesh dhe duhet të shihet se si veprohet tutje në mënyrë që të kemi një rezultat të kënaqshëm dhe të arrijmë synimet tona që i kemi sa i përket shtrirjes së sovranitetit, demokracisë e ligjshmërisë në të gjithë territorin e vendit”, ka thënë Murati.

Ai mes tjerash ka deklaruar se nëse veç do të diskutohej për sanksione, atëherë do të diskutohej për sanksione që do të duhej t’i vendoseshin Serbisë, për siç ka thënë shkelje të vazhdueshme të marrëveshjeve.

“Nëse veç do të diskutohej për sanksione të mundshme, do të diskutohej se çfarë sanksionesh do të duhej t’i vendoseshin shtetit të Serbisë për shkak se në vazhdimësi ka shkelur marrëveshjet për të cilat jemi dakorduar si palë, duke filluar nga kjo e fundit, marrëveshja e nënshkruar apo e dakorduar në Ohër, të cilën pala serbe refuzoi ta nënshkruante dhe shkeljet flagrante që ka bërë në vazhdimësi, duke filluar nga votimi kundër dhe lobimi për të votuar kundër shtetet e tjera, për ecjen përpara në proces të anëtarësimit në Këshillin e Evropës, pra konsideroj se çka do të duhej të na brengoste, është se çka do të duhej, ose cilat sanksione duhet t’i vendoseshin shtetit serb”, ka theksuar Murati. /Telegrafi/