“Milingona e Artë” shpall fituesit për arritjet e vitit 2015 (Foto)

Spektakli “Milingona e Artë” natën e mbrëmshme ka shpallur shqiptarët më të suksesshëm të vitit 2015 në Maqedoni.

Në një atmosferë festive me shumë të ftuar, spektakli i vetëm që shpërblen shqiptarët në Maqedoni për sukseset brenda një viti, ka zgjedhur më të mirët në secilën fushë për sukseset e tyre brenda dhe jashtë vendit, transmeton Telegrafi.

Për arritjen më të madhe në muzikë u shpërblyen grupi “Blla blla blla”, të cilët ishin në konkurencë me Adrian Gaxhën dhe Lindon Berishën, të cilët deri në fund ishin pretendentët kryesor për këtë çmim si artistët më të suksesshëm jo vetëm në Maqedoni.

Qëndrim Rijani arriti të triumfojë në një konkurencë të fortë me aktorët Xhevdet Jashari dhe Luran Ahmeti në kategorinë “Arritja e vitit në artet e performuara- arti skenik”.

Arritja e vitit në artet pamore: 

Nevzat Bejtuli Kica

Arritja e vitit në afirmimin e kulturës:

Teatri i Tetovës

Arritja e vitit në botime shkencore, letërsi dhe publicistikë:

Lindita Ahmeti

Arritja e vitit në media:

Lajmet – Alsat M

Arrtja e vitit në artet e performuara-muzikë serioze:

Shkëlzen Baftiari – Piano

Arritja e vitit në sport:

Jasin Rexhallari

Talenti i vitit:

Murat Zherka – Regjisor

Veç kategorive me të nominuar “Milingona e Artë” ka ndarë edhe katër çmimet e nderit.

Remzi Nesimi, profesor dhe studiues i gjuhës shqipe, njëri nga figurat kryesore të mendimit shkencor dhe intelektual të shqiptarëve të Maqedonisë e më gjerë.

Grupi Telex, i përbërë nga djemtë shkupian, në vitet ’80 krijojnë muzikë e cila është pjesë e rëndësishme e mbamendjes tonë kolektive. Impakti i tyre ishte dhe është aq i madh sa breza të tërë muzikantësh i janë referuar dhe i kanë ndjekur. Konsiderohen si pionierët e rokut shqiptar dhe tejet unik me krijimet e tyre.

Zllatko Origjanski, kompozitor dhe muzikant, merr çmimin për afirmimin e arritjeve dhe kulturën shqiptare, çmim i cili çdo vit i ndahet një jo-shqiptari.

Fondacionit “Peshku i artë” këtë vit i ndahet mirënjohje për humanizëm.
Aktivistë të këtij fondacioni po ndërmarrin një nga nismat më humane e prekëse në shoqërinë tonë duke i plotësuar dëshirat e fëmijëve me sëmundje të rënda./Telegrafi/