Mijëra njerëz mbushën rrugët e Stambollit, në natën e pestë të demonstratave kundër arrestimit të Ekrem Imamoglu

Mijëra protestues mbushën rrugët e Stambollit të dielën në natën e pestë të demonstratave kundër arrestimit të rivalit kryesor të presidentit turk, Ekrem Imamoglu.

Kryebashkiaku i Stambollit u arrestua të mërkurën dhe u burgos në pritje të gjyqit mbi akuzat për korrupsion.

Dhe sipas mediave të huaja, përcjell Telegrafi, policia përdori “sprej piper” dhe gjuajti plumba gome në turmën që u mblodh jashtë bashkisë së Stambollit.

Duke raportuar nga Stambolli të dielën në mbrëmje, korrespondentja e Sky News, Alex Crawford i përshkroi protestat si “relativisht paqësore” por tha se ato ishin “protestat më të mëdha që Turqia ka parë në më shumë se një dekadë”.

Demonstratat e mëdha kanë vazhduar pavarësisht ndalimit të tubimeve në Stamboll të vendosur këtë javë – por shumë protestues fshehën fytyrat e tyre me maska.

Shumica e protestuesve nuk donin të flisnin në kamera pasi kishin frikë se mos i njihnin, tha Crawford, por ata dolën në rrugë sepse “ndjejnë se demokracia e tyre po gërryhet”.

Ajo theksoi se mbeten pyetjet për sa kohë autoritetet do të lejojnë që këto protesta të vazhdojnë – dhe nëse ato do të përshkallëzohen në një krizë të vërtetë për presidentin Rexhep Tajip Erdogan.

Protestat u intensifikuan pasi Imamoglu u akuzua të dielën për drejtimin e një organizate kriminale, marrjen e ryshfeteve, zhvatjen, regjistrimin e paligjshëm të të dhënave personale dhe manipulimin e ofertave.

Kërkesa për të ndaluar zotin Imamoglu për akuza të lidhura me terrorin u refuzua.

Pas vendimit, ai u transferua në burgun e Silivrit, në perëndim të Stambollit.

Imamoglu i ka etiketuar të gjitha pretendimet “akuza dhe shpifje të paimagjinueshme”.

Dhe shumë kritikë e shohin ndalimin e tij si një lëvizje politike për ta hequr atë nga gara presidenciale e vitit 2028 – duke thelluar shqetësimet mbi demokracinë e vendit dhe sundimin e ligjit.

Por qeveria turke mohon se arrestimi i Imamoglu ishte i motivuar politikisht dhe thotë se gjykatat janë të pavarura. /Telegrafi/