Mësohet se diplomati i deportuar nga Bullgaria është Vladimir Romanchenko – ndihmës atasheh i Ambasadës ruse në Sofje

Edhe pse zyrtarisht as pala bullgare dhe as ajo ruse nuk e kanë bërë të ditur identitetin e diplomatit rusë të deportuar nga Bullgaria, mediet e vendit kanë arritur të mësojnë se diplomati rus i shpallur “person non-grata”, është një nga dy ndihmës atashetë e Ambasadës ruse në Sofje.

Ambasada Ruse në Sofje ka dy ndihmës atashe, kolonelin Vladimir Romanchenko dhe nënkolonelin Alexei Brazhnik.

Koloneli Romanchenko mbanë këtë post për më shumë se 10 vite dhe se shërbimi i tij në Bullgari, përkon me kohen kur kishin ndodhur shpërthimet e depove të municioneve.

Për shkak se ka qenë me shërbim në këtë vend në kohen kur ka ndodhur shpërthimi i parë i depove të armatimeve në vitin 2011, pothuajse të gjithë besojnë që personi i deportuar është Romanchenko.

Nënkoloneli Brazhnik kishte ardhur me shërbim në Ambasadën Ruse në Sofje më vonë, andaj ka më pak gjasa që të jetë personi i deportuar.

Lexo po ashtu Si u përpoq Njësia 29155 e GRU-së ruse që nëpërmjet Çekisë dhe Bullgarisë të ndërhyjë në Ukrainë?

Brazhnik e ka pasion qitjen me armë dhe për çdo vit ka marr pjesë në turneun e qitjes me armë, që organizohet për nderë të luftës bullgaro-serbe, që festohet edhe si dita e Forcave tokësore të Ushtrisë Bullgare.

Ai në vitin 2017, në kategorinë e  përfaqësuesve diplomatik të akredituar në Bullgari, kishte zënë vendin e parë dhe për këtë ishte nderuar me medalje dhe mirënjohje.

Vladimir Romanchenko dhe Alexei Brazhnik e kishin shef, atasheun ushtarak Vasily Sazanovich, i cili ishte shpallur “person non-grata” në muajin dhjetor të vitit të kaluar, pasi ishte zënë duke mbledhur informacione inteligjente, që kishin të bënin me Bullgarinë dhe NATO-n.

Në vend te Sazanovich, në Ambasadën Ruse në pozitën e atasheut ushtarak kishte ardhur Vadim Bazhanov, ndërsa në pozitat e ndihmës atasheve kishin vazhduar punën, Vladimir Romanchenkon dhe Alexei Brazhnik.

Dëbimi i ndihmës atasheut të Ambasadës së Rusisë në Sofje, vije dy ditë pasi që Shërbimi Inteligjent (DANS) dhe Prokuroria bullgare kishin bërë të ditur se kanë arritur të zbulojnë se mbrapa katër shpërthimeve të depove të municioneve (shpërthimi i parë kishte ndodhur në vitin 2011, ndërsa i fundit në 2020)  të biznesmenit Emilian Gebrev, qëndrojnë gjashtë agjentë GRU-së ruse, të cilat janë përgjegjëse edhe për tentimin për likuidimin e tij.

Se marrëdhënieve diplomatike bullgaro-ruse janë acaruar u pa edhe dje kur zëvëndëskryeministrja dhe ministrja e Punëve të Jashtme të Bullgarisë, Ekaterina Zaharieva kishte biseduar me ambasadoren e Rusisë në Sofje, Eleonora Mitrofanova dhe i kishte kërkuar që Rusia të bashkëpunoj në hetimet në lidhje me shpërthimet dhe tentimin për likuidimin e biznesmenit bullgar Emilian Gebrev. Besohet që edhe ambasadorja Mitrofanova është pjesë e Shërbimit rus  Inteligjencës.

Zaharieva ja bëri me dije ambasadores Mitrofanova, se Bullgaria rezervon të drejtën për të ndërmarr veprime të mëtejme dhe kërkon nga ambasadori rus në Sofje, që të ndërpres veprimet e Shërbimeve ruse në Bullgari, të cilët shfrytëzojnë si mbulesë postet diplomatike, duke e shkelur Konventën e Vjenës për Marrëdhëniet Diplomatike. /Telegrafi/