Meloni takohet me Trumpin në Shtëpinë e Bardhë – italiania befasohet nga furia e gazetarëve

Kryeministrja e Italisë, Giorgia Meloni, u takua sot në Shtëpinë e Bardhë me presidentin amerikan, Donald Trump, dhe një reagim i saj tërhoqi veçanërisht vëmendjen botërore.

Pas takimit, Meloni dhe Trump mbajtën edhe një konferencë për shtyp, ku folën për përshtypjet nga biseda që zhvilluan në Uashington.

Pas fjalimeve hyrëse të liderëve, presidenti amerikan u tha gazetarëve të pranishëm se mund të fillonin me pyetjet. Megjithatë, gazetarët nuk ndoqën ndonjë radhë të caktuar dhe të gjithë njëkohësisht u përpoqën t’i bënin pyetje të dyve.

Kryeministrja italiane në atë moment nuk mundi ta fshehë reagimin e saj dhe me një gjest tregoi qartë se ishte e habitur nga ky lloj “cunami mediatik”.

Konferencat për shtyp të Shtëpisë së Bardhë gjithmonë kanë pasur një mbulim të gjerë mediatik, por me ardhjen e republikanit, ky aspekt u ngrit në një nivel më të lartë.

Edhe pse pyetjet e gazetarëve pas takimeve të Trumpit me liderë të tjerë shtetërorë zakonisht janë brenda një kornize të zakonshme, disa situata kanë treguar se gjërat mund të marrin edhe një drejtim krejt tjetër dhe të bëhen të sikletshme për mysafirin.

Këtë e ka përjetuar më së miri presidenti i Ukrainës, Volodymyr Zelensky, të cilin një gazetar amerikan e pyeti pse nuk vesh kurrë kostum. Kjo pyetje shkaktoi një përplasje që bëri xhiron e botës, në të cilën u përfshinë anëtarë të administratës së Trumpit dhe vetë lideri ukrainas. /Telegrafi/