Ministri belg i Mbrojtjes është futur në një debat publik me ish-presidentin e Rusisë për temën e luftës bërthamore.
Madje në përplasjen ndërmjet tyre, ministri belg ka përdorur edhe një mesazh së bashku me këngën "Calm Down" të Selena Gomez.
Sipas mediave të huaja, përcjell Telegrafi, Theo Francken, ministri i mbrojtjes i Belgjikës, tha më parë këtë javë se NATO do ta “fshinte Moskën nga faqja e dheut” nëse Kremlini do të sulmonte ndonjëherë Brukselin.
Deklarata shkaktoi një reagim të zemëruar nga Dmitry Medvedev, ish-presidenti i Rusisë dhe nënkryetari aktual i Këshillit të Sigurisë në Moskë, i njohur për shpërthimet e tij në mediat sociale.
Medvedev e quajti Franckenin një "budalla" dhe paralajmëroi se "superarma bërthamore" e Kremlinit, torpedoja Poseidon, ishte testuar këtë javë.
Medvedev e përshkroi atë si një "armë të vërtetë të Apokalipsit".
Në përgjigje të një përdoruesi në platformën X i cili sugjeroi përdorimin e Belgjikës si një vend testimi, Medvedev shtoi: "Atëherë Belgjika do të zhduket".
Dhe të enjten, Francken iu përgjigj Medvedevit në një mesazh në Instagram, duke thënë:
"Kryengacmuesi i Rusisë nuk pushon kurrë së kërcënuari dhe ofenduari".
“NATO nuk është në luftë me Federatën Ruse dhe sigurisht që nuk e dëshiron atë… Por parimi i ‘përgjigjes’ së aleancës sonë nuk është sfiduar kurrë në 76 vitet e saj”, tha ai. “Kjo është ajo që doja të thoja në intervistën dhe nuk tërheq asnjë fjalë”, theksoi ai.
Mesazhi u shoqërua nga hiti i vitit 2023 i këngëtares amerikane të muzikës pop Selena Gomez, "Calm Down", — një thirrje e dukshme drejtuar Kremlinit për t'u qetësuar.
Kënga u publikua për herë të parë nga këngëtarja nigeriane Rema në vitin 2022 dhe më vonë u remiksua me Gomez në vitin 2023. /Telegrafi/
