Media sociale formëson politikën e Kosovës

Media sociale po bëhet gjithnjë e më shumë mjet komunikimi në çështjet politike-sociale në Kosovë, duke ndryshuar dinamikat e asaj se si njerëzit ndërveprojnë e organizohen.

Merrni sajtin e rrjetëzimit social Facebook, një medium i përqafuar nga brezat e mesëm si dhe nga rinia e Kosovës. Facebook ka shkuar përtej të qënurit vetëm një rrjet komunikimi për kontaktin me miqtë dhe është bërë një forum gjigant diskutimi mbi politikën e vendit dhe zhvillimin social.

"Facebook lehtëson shkëmbimin e ideve, bashkon njerëzit mbi kauzat nëpërmjet ‘aktivizmit online’, por nuk përkthehet shumë në veprim. Rrjetet sociale japin më shumë hapësirë për liri shprehjeje se sa vende të tjera, kështu që ato janë bërë platforma për kultivimin e mendimit alternativ e kritik," i tha SETimes komentatori Agon Maliqi.

Ilustruese për këtë prirje është Pimpsons-Kosova, një seri e Facebook që satirizon politikanët dhe nismat politike nëpërmjet vizatimeve me kartona. Pimpsons po zgjeron dhe po bën më të mprehtë debatin politik në një brez të tërë votuesish të rinj, duke ofruar një konsensus aq shumë të nevojshëm si dhe shtytje për veprim.

"Fakti që Pimpsons u nis në Facebook dhe u bë kaq i suksesshëm është një shenjë se Facebook po krijon një hapësirë për shprehje dhe komunikim që ka munguar më parë," tha Maliqi.

Mundësia që u jepet interesave të posaçme politike luan gjithashtu një rol kyç në përhapjen e medias sociale.

Më e suksesshmja në përdorimin e media sociale për qëllimet politike është Lëvizja Vetëvendosje, e cila nisi protestat dhe forma të tjera të kundërshtimit të nismave të partive qeverisëse.

Vetëvendosje motivoi një bazë të gjerë politike nëpërmjet një fushate aktive në Facebook kundër Planit Gjashtë Pikash të OKB për Mitrovicën e Veriut, planit të Ahtisaarit dhe një tjetër kundër korrupsionit, të quajtur "Kundër Vjedhjes". Në një tubim, Vetëvendosje mblodhi së bashku 95,000 vetë.

Të tjerë, si Faton Deliu përdorin Twitter në vend të Facebook. "Twitter mbron privatësinë time më shumë se Facebook dhe kjo është arsyeja pse unë përdor atë më shumë. Në Kosovë, njerëzit kanë maninë e Facebook. Unë mendoj se kjo nuk është diçka gabim por duke përdorur Twitter më shumë do të ishte mirë sepse njerëzit do të jenë në gjendje të gjejnë të njëjtin informacion apo lidhje në pak a shumë të njëjtën mënyrë," i tha Deliu SETimes.

Duke kuptuar se media sociale po merr ngadalë një rol qëndror, universitetet po përpiqen të lëvizin në përputhje me këtë. Kolegji Universitar Universum kohët e fundit njoftoi se duke nisur nga shtatori, do të ofrojë mësime nëpërmjet rrjeteve sociale si Facebook, Google Docs, SlideShare, YouTube, Blogger dhe WordPress.

Zyrtarët e universitetit thonë se studentët nuk do të marrin ndonjë material të shtypur; çdo gjë do të gjendet në vend të kësaj në IPad. E gjithë përmbajtja do të zhvillohet nëpërmjet ndërveprimtarisë tërësore të medias me studentët, duke përdorur vetëm rrjetet sociale.

"Në një kohë të globalizimit, jeta është përshpejtuar kaq shumë sa që ne nuk mund të presim që studentët tanë të ndjekin më formatin tradicional të të mësuarit. Në qoftë se ata harxhojnë shumicën e kohës së tyre në Facebook apo YouTube, ne duhet të ndjekim interesat e tyre dhe do të përdorim rrjetet sociale për të rritur rendimentin gjatë studimeve. iPad që studentët tanë do të marrin falas do të jetë simbol i metodës sonë moderne në studimin e avancuar," i tha SETimes drejtori ekzekutiv i Kolegjit Universitar Universum, Alejtin Berisha. /Telegrafi/