Mbeti më shumë se gjysmë ore në ajër me aeroplanin e tij, Pacolli akuzon Autoritetin e Aviacionit Civil të Kosovës

Kryetari i Aleancës Kosova e Re, Behgjet Pacolli, nëpërmjet një postimi në Facebook ka thënë se ditën e enjte, aeroplani i tij, me shtatë pasagjerë për më shumë se gjysmë ore kanë pritur në ajër për të aterruar në Aeroportin e Prishtinës .

Pacolli ka shkruar se askush nuk e dinë se pse ka ndodhur kjo, dhe se pasagjerët kanë përjetuar vështirësi për shkak të turbulencave të mëdha në territorin e pritjes për aterrim, transmeton Telegrafi.

“Dje pasdite, autoritetet e aviacionit civil të Kosovës na lanë në ajër (jo edhe mbi territorin e Kosovës), për 37 minuta. Askush nga ne nuk e di arsyen, por një gjë është e sigurt; Operatori amerikan ka leje të përhershme për aterrim në Prishtinë. Janë përfillur të gjitha veprimet e parapara me rregullat e fluturimit. Aeroporti i Prishtinës na informoi se nuk ka pasur asnjë pengesë për aterrim”.

“Në aeroplan kanë qenë 7 pasagjerë të cilët kanë përjetuar vështirësi për shkak të turbulencave të mëdha në territorin e pritjes për aterrim”, shkruan Pacolli në Facebook.

Tutje, ai ka pohuar se shpreson që të mëson arsyen se pse ka ndodhur ky veprim nga autoritetet e aviacionit civil të Kosovës.

“Shpresoj shumë që këto ditë do të njoftohemi për arsyen e këtij veprimi të shëmtuar qe si duket vjen nga vullneti i individëve të papërgjegjshëm që keqpërdorin detyrat e tyre zyrtare, megjithatë organet e drejtësisë janë në veprim”, vijon reagimi./Telegrafi/